Ихлас ҡаршы алды Рауза апай менән Фәннүр ағай. Дәртле кеше ҡасан да дәртен һүрелтмәй, матур­ҙа­ры төҫ ташламай инде ул. Рауза апай милли кейемен кейеп үк ҡуй­ғайны. Йырлы-моңло ғаиләлә, ауыҙ­ҙарынан сыҡҡан һүҙҙәре ши­ғыр булып ҡойол­ғанда танышыу оҙаҡҡа һуҙыла тиме ни?! Шунда уҡ күптән күреп-белгән кешеләргә әүе­релдек тә ҡуйҙыҡ. Рауза апай оса-ҡуна тигәндәй ҡул эштәрен күр­һәтеп, “аһ” иттерҙе. Әле күпе­реп торған шәл­дәре һоҡландырҙы, әле эшләпә, семәрле кофталарҙы, япма­ларҙы ҡулға алдыҡ. Сигелгән, бәй­ләнгән әйберҙәре бүлмәне тағы ла сағыу­ландырҙы, йылылыҡ өҫтә­не.
Рауза Шәкүр ҡыҙы дебет шәл бәй­ләргә IV класта өйрәнгән. Хә­йер, Ҡоръ­ятмаҫ ауылы ҡыҙҙары хаҡын­да һүҙ барғанда яңылыҡ тү­гел был, улар бә­ләкәйҙән шәл бәй­ләү оҫтаһы булып таныла. Ҡул эше­нә маһирлы­ғы менән бергә йыр-бе­йеүгә лә ғашиҡ йән ул. Ата­һының скрипкала, ағаһының гармунда уйна­ғанын күреп-тыңлап үҫкән ҡыҙ, киреһенсә, йыр-моңға битараф булһа, аптырар инең. Етмәһә, бер өләсәһе ҡурайҙа ла һыҙҙырған.
Ауыл йәштәре дәррәү спектакль әҙер­ләгән, тирә-яҡ ауылдарға концерт ҡуйып та йөрөгән. Әйткәндәй, Рауза апай менән Фәннүр ағай бер ауылдан, йәшлектәре бергә уҙған, икеһе лә үҙешмәкәрҙәр түңәрәгенә йөрөгән. Ана шул йыр-моңға ға­шиҡ­лыҡ яҡынайтҡан да инде дәртле, һәләтле егет менән ҡыҙҙы. Дүрт йыл дуҫлашып йөрөгән­дән, үҙҙәрен ғаилә тормошона әҙер­лә­гән­дән һуң ғына ҡауышҡан Низа­мет­диновтар.
Ҡоръятмаҫта урта мәктәп булмау сәбәпле, Х класты тамамлай алмай­ҙар. Әммә икеһенең дә төп­лө белем алырға теләге ҙур була. Шуға бергәләп киске мәктәпкә йөрөйҙәр. Артабан Рауза апай ситтән тороп Стәрлетамаҡ педагогия институтын тамамлай, уҡы­тыу­сы һөнәренә эйә була. Фәннүр ағай баш ҡалала баянсылар мәктәбен­дә остазы Роберт Заһретдиновтан моң серҙәренә төшөнә, Өфө йылға учи­лище­һында уҡый.
Өҫтәлдәге бәләкәйерәк ике гар­мун­ға ла, урындыҡтағы ҙурыһына ла ҡа­раш ташлап алыуыбыҙҙы һи­ҙеп алған гармунсы ағайыбыҙ, һис инәлтмәй, һүҙҙәрен дә, көйөн дә үҙе ижад иткән “Асылыкүл” йырын ишет­терҙе. Колхозда ла, Ишем­байҙа заводта эш­ләгәндә лә үҙеш­мәкәр түңәрәккә йө­рөргә ваҡыт еткерә ул.
Ишембайҙа ансамбль көслө ине, тип хәтерләй. Дәүләкәнгә ҡайт­ҡас, фольклор ансамбле ойоштороуға ла булышлыҡ итәләр. 15 йыл элек бул­дырылған был коллектив хәҙер – райондың йөҙөк ҡашы. Фәннүр ағай ансамбль ҡа­тын-ҡыҙҙары өсөн йырҙар ижад итә, ­байрам­дарҙы биҙәүҙә ярҙам­лаша.
– Барыһы ла йыр-моңға ғашиҡ йән­дәр тупланған унда. Бер туған кеүек­тәр, рухлылар, тырыштар. Рау­за мә­ҙә­ниәт йортонан хатта йәшәреп ҡайта, – тип йылмая Фән­нүр Миңлейәр улы.
– Беҙҙе мәжлестәргә йыш са­ҡыр­ҙылар, әле лә байрамдарҙан ҡалдыр­майҙар. Матди байлыҡтан бигерәк рухи байлыҡ кәрәк бит кешегә. Кү­ңелдәрендәге рухи буш­лыҡты йыр-моңобоҙ менән аҙға ғына булһа тул­тырыуҙан үҙебеҙ ҙә ҙур ҡәнәғәтлек алабыҙ. Туйҙарға бүләгебеҙ ҡулда­рым­дың йылыһын һалған, күҙ нур­ҙарым түгелгән аҡ түбәтәй менән аҡ шәл булһа, күс­тәнәсебеҙ – гармун моңо, йыр-бейеү. Ҡул эштәремде их­лас бүләк итәм. Берәй шөғөлгә бире­леүҙе хобби тиҙәрме әле, бәйләргә, си­гергә яратыуым шул була инде, – ти Рауза Шәкүр ҡыҙы.
– Рауза апай һеҙҙе лә бәйләп кейендерәме һуң? – тип ҡыҙыҡ­һы­на­быҙ Фәннүр ағайҙан.
– Мин тәүге сиратта инде. Түбә­тәйҙәрҙең төрлөһөн бәйләп бүләк итә, – ти ул, ҡәнәғәт йылмайып.
– Икебеҙ ҙә уҡырға яратабыҙ. Гәзит-журналдан әҙәби әҫәрҙәр уҡый торғас, 67 йәшемдә, хаҡлы ялға туҡтағас, үҙем шиғыр яҙа башланым. Бик ҡыҙыҡ ҡына килеп сыҡты ул. Бер яҡын туға­нымдың ҡыҙының туйынан һуң килде ил­һам. Хоҙайҙың хикмәтелер, моға­йын, улар­ҙың йорто элекке мәсет урынында ине. Тәүге тәнҡитсем, әл­биттә, Рауза, иң элек уға уҡып күрһәтәм. Оҡшамай тиһә, ҡаршы­лашып тороу юҡ, үҙгәр­тәм. Шөкөр, өс китабым донъя күрҙе. Авторҙар тупланмаһында ла сыҡты шиғыр­ҙарым. Шулай, пенсияла ла тик ятмайбыҙ, ижад менән шөғөл­лә­нәбеҙ, баҡсала эшләйбеҙ, мәҙәни сараларҙа ҡатнашабыҙ. Әйткән­дәй, өс китабым­ды ла үҙ иҫәбемә нәшер иттем. Пенсия аҡсаһына. Ғөмүмән, байлыҡ тип йәшә­мәнек, эшләп тап­ҡан аҡсаны күңел күтә­ренкелеге өҫтәгән нәмәләр өсөн тотондоҡ. Яңы ғына баҫылған ки­та­быңды ҡулыңа алыу әйтеп бирә ал­маҫлыҡ шатлыҡ кисертә. Рауза апа­йы­ғыҙ ҙа яҙышып алғылай. Ауы­лыбыҙға ар­нап ҡобайыр ижад итте. Хәҙер тарихи темаларға то­тонорға иҫәбем бар, – ти Фәннүр Низаметдинов.
Әйткәндәй, күптән түгел генә Рауза Шәкүр ҡыҙы менән Фәннүр Миңлейәр улы алтын туйҙарын билдәләгән. Ра­йон мәҙәниәт йортонда матур итеп, ҙурлап үткәр­гәндәр Низаметдинов­тарҙың ғаилә байрамын. Күңелдәре тулы моң, ижад ҡомары менән янған матур парҙың артабанғы көндәре лә бө­гөнгө ялҡынын һүрелтмәһен, бергә­лектә, тигеҙлектә йәшәргә яҙһын.