Республикала Башҡортостандың халыҡ шағиры Мостай Кәримдең тыуыуына 95 йыл тулыуға арналған саралар дауам итә.

Шәхестең тыуған көнөндә Баш­ҡортостан юлдаш телевидениеһы каналында уның тураһында фильмдар, шиғырҙарына яҙылған йырҙарҙан торған концерттар күрһәтелде. Мос­тай Кәрим исемендәге Милли йәштәр театры коллективы халыҡ шағирының һәйкәленә сәскә һалды. Мос­тафа Сафа улын иҫкә алыу тан­танаһына Башҡортостандың мә­ҙә­ниәт министры урынбаҫары Рәнис Алтынбаев, Яҙыусылар союзы идараһы рәйесе Наил Ғәйетбаев, әҙиптәр, театр вәкилдәре килгәйне. Яҙыусылар һәм актерҙар Мостай Кәримдең әҫәрҙәренән өҙөктәр уҡыны.
Бөгөн кис Йәштәр театрында Өфө һәм Шишмә райондары хакимиәттәре, Башҡортостандың Яҙыусылар союзы вәкилдәре, шағирҙың туғандары, ижадын һөйөүселәр ҡатнашлығында юбилей кисәһе уҙғарыла.
– Сараға килгәндәргә театрлаш­тырылған тамаша тәҡдим ителә. Актерҙар бөйөк шағирҙың тормош юлы, ижады хаҡында һөйләйәсәк, шиғырҙарын уҡыясаҡ, йырҙарын башҡарасаҡ, хәтирәләрен уртаҡла­шасаҡ, — тине театрҙың әҙәби бүлеге хеҙмәткәре Юлиә Мәжитова.
Иртәгә тантаналар Мостай Кәримдең тыуған яғында — Шишмә районында дауам итә. Келәш ауылындағы мәктәп янында ағас ултыртыу, яҡташтар менән осрашыу, Ҡыҙҙар тауында усаҡ яғыу көтөлә. Ҡунаҡтар Шишмә ҡасабаһындағы мәҙәниәт һарайында ойошторолған әҙәби-музыкаль кисәгә саҡырыла.