Районыбыҙҙың Ҡыҫынды клубы мөдире Раушан Хажиәхмәтов – ауылдаштары өсөн янып-көйөп йәшәгән шәхес. Һәр байрам кисәһен үҙенсәлекле итеп ойошторған ир-азаматтың дәрт-дарманы район йәштәренә йоғонто яһамай ҡалмай: яҡын-тирәләге егет һәм ҡыҙҙар ҙа бында килергә атлығып тора.
Ошо көндәрҙә мөдирҙең тырышлығы менән ауыл клубы 100 мең һумлыҡ грантҡа лайыҡ булды.
– Бындай ҡаҙанышҡа өлгәшеү өсөн тәү сиратта эшеңә яуаплы ҡарау мөһим. Ауылдаштарҙы клубта уҙғарылған төрлө сараларға йәлеп итеү ҙә, шул уҡ ваҡытта 2011 – 2013 йылдарҙа эшләнгән проект танытмаһын (фото һәм видеоматериалдар) әҙерләү ҙә тиккә булманы, – ти Раушан Хажиәхмәтов. – Район хакимиәтенең мәҙәниәт бүлеге хеҙмәткәрҙәре тәҡдиме менән беҙҙең ауыл клубы “Иң яҡшы мәҙәниәт учреждениеһы” тип билдәләнде һәм грантҡа лайыҡ булды. Уны артабан матди яҡтан яҡшыртыуға ҡорамалдар, тауышты көйләүсе аппараттар алынасаҡ. Был ҡаҙаныш – уртаҡ хеҙмәт емеше. Һәр сарала әүҙем ҡатнашҡан мәктәп уҡыусыларына, ауыл халҡына рәхмәтлемен. Юғары һөҙөмтәгә берҙәм булғанда ғына өлгәшеп була.