Акция “Ер планетаһы, беҙ – һинең балаларың” фотофестивален, төнь­яҡ-көнсығыш райондар буйлап фо­тотурҙы үҙ эсенә алды. Сарала ҡат­­нашыусылар фотоға төшөрөү темаһын һәм объекттарын һайлап, дүрт төркөмгә бүленде. Ике көн эсендә улар баш ҡаланың күп кенә иҫтәлекле урындарында булды. Республика буйынса уларҙың маршруты Балаҡатай, Ҡыйғы, Дыуан һәм Салауат райондарынан үтте.
Ҡыйғы районында сәйәхәтселәр Йыланлы ауыл мәҙәниәт йортонда, үҫ­мерҙәр өсөн приютта булды. Иб­райҙа “Һомай” фольклор ансамбле менән таныштылар, “Маяҡ” лагерын­да ҡыҙыҡлы кисәлә ҡатнаш­тылар. Иртәгәһенә ҡунаҡтар Дүшәмбикә ауылында “Һыу башлатыу” йолаһын ҡараны. Абзайҙа быйма баҫыу оҫтаһы С. Мәхмүтов менән осраштылар.
– Башҡортостандың хозур тәбиғә­те таң ҡалдырҙы: йәшел урман­дар, сәскәле болондар, ҡунаҡсыл халыҡ. Ағайым Навид Хади Баш­ҡортостанға икенсе тапҡыр килде. Тәүге сәфә­ренән һуң “Бал тәме – һөйөүҙең хуш еҫе” тигән китабы донъя күрҙе. Өфөлә уның фото­күргәҙмәһе асыл­ды, – тип тәьҫораттары менән уртаҡ­лашты Ирандан килгән Р. Борзук.
– Ике көн эсендә бай материал тупланыҡ. Сит ил фоторәссамдары үҙҙәренең һүрәттәре аша ватандаштарына Башҡортостан тура­һында мәғлүмәт еткерәсәк. ШОС һәм БРИКС саммиттарына ҡарата иң яҡшы фотолар төрлө телдәрҙә донъя күргән фотоаль­бом­дарҙа баҫыласаҡ, – тине төркөмдөң етәксеһе, Рәсәйҙең һәм Башҡорт­остан­дың атҡаҙанған мәҙәниәт хеҙмәткәре Рәмил Килмә­мәтов.
Дыуан районында Йүрүҙән йыл­ғаһы ярында командаларҙың береһе “Мәңгелек саҡырыу” фильмы төшө­рөлгән урындарҙан үтергә теләне. Әммә һауа торошо шарттары Саба­ҡай ҡая­һын, бөтөп барған Ҡалмаш, Бурцевка һәм Ежовка ауылдарын күрергә мөм­кинлек бирмәне.
– Пейзаждар йыш ҡына оҡшаш була, – ти Навид Хади. – Ошо район­дағы тәбиғәт күренештәре Мичиганды хәтерләтте. Хатта йылғаның ҡул­тығы ла шундағы кеүек. Әммә бер ерҙә лә бындай сыңлап торған тынлыҡты ишеткәнем булманы. Был – һеҙҙең мөғжизә, ожмах!
Балаҡатай районында фоторәс­сам­дар урын­дағы хакимиәт башлығы Павел Мехоношин менән осрашты. Башта ҡунаҡтар тимерлек цехына юлланды, унан һуң Михайло-Архангел ҡорамында булды. Артабан Ямаш, Нөгөш, Ҡарлыхан ауылдары­на юл алды.
Ҡунаҡтар Билән ауылында ойош­торолған Өфө йылғаһы буйы баш­ҡорттары йыйынында ҡатнашты. Бында улар башҡорт мәҙәниәте, баш­ҡорт тирмәһе менән танышты, фольклор ансамблдәренең сығышын ҡараны.
Салауат районында сәйәхәтселәр Салауат Юлаевтың музейында, “Ҡор­ғаҙаҡ” шишмәһендә, “Янғантау” шифаханаһында булды.
Ойоштороу комитеты “Тәбиғәт. Кеше. Мәҙәниәт-2014” акцияһының иң яҡшы фоторәссамын билдәләне. Был исемгә “Республика Башкортос­тан” гәзитенең фотохәбәрсеһе, Рә­сәй­ҙең һәм Башҡортостандың ат­­ҡаҙ­анған мәҙәниәт хеҙ­мәткәре, Шә­һит Хоҙайбирҙин исемендәге премия лауреаты Рәйеф Баҙыҡов лайыҡ булды. Уға Рәсәй Фоторәссамдар союзының дипломы һәм иҫтәлекле миҙалы тапшырылды.