Илназ Илнур улы Ҡарабаш урта мәктәбендә белем алғанда, район сәнғәт мәктәбенә йөрөп, уҡытыусыһы Риф Шәрәфетдинов етәкселегендә баян серҙәренә өйрәнә. Артабан ул Илназдың айырылғыһыҙ дуҫына әүерелә. Тормош юлын ижадтан башҡа күҙ алдына килтермәгән егет 9-сы кластан һуң Өфө сәнғәт училищеһын уңышлы тамамлай.
Беренсе йырҙарын Илназ сәнғәт мәктәбендә уҡыған йылдарында ижад итә. Ул шағирә Кәүсәриә Шафиҡова, Әсһәр Кәшфуллин, Виниса Фәттәхова, Рөстәм Закуандар менән бергәләп эшләй. Уның ижадында тыуған яҡҡа мөхәббәт темаһы айырыуса ҙур урын алып тора. Тәрән мәғәнәле, матур эстәлекле «Илешем», «Туғанлыҡ сере», «Ауылҡайым» һәм башҡа йырҙарын халыҡ яратып ҡабул итә. Бөгөнгө көндә ул – 50-нән ашыу йыр авторы. Илназ бик моңло итеп йырлай, йырға һүҙҙәрен дә үҙе яҙа. «Туған тел» каналы аша уның йырҙарына төшөрөлгән матур клиптар күрһәтелә. Бер минут та тик тора белмәгән егет һәр ваҡыт ниндәйҙер эҙләнеүҙә. Нисек тә булһа үҙенең тормошон күңеллерәк, ваҡиғаларға бай итергә тырыша.
Бөгөнгө көндә ул Айгөл һәм Ришат Шәйхетдиновтар төркөмөнөң баянсыһы, шул уҡ ваҡытта район мәҙәниәт һарайында тауыш операторы һәм балалар ижад йортонда баянсы булып та эшләй.
– Талантлы, ижади кешеләр менән бергә йәшәргә, эшләргә мөмкинлек биргәне өсөн генә лә Аллаһы Тәғәләгә рәхмәтлемен, – ти Илназ. Тәбиғәттән бирелгән һәләтен ул Бөрө социаль-педагогия академияһының музыка факультетында камиллаштыра.
Оҫта музыкант булыуы өҫтөнә, Илназ – тормошта ла, сәхнәлә лә итәғәтле, кешелекле шәхес. Ул бер ҡасан да хафаланмай, танауын сөймәй, тыйнаҡ. Сәхнәгә йылмайып сығып баҫа ла күңелендәге моңдарын баян телдәренә күсерә. Гармунсының ошо моңға барлыҡ күңел хистәрен һалыуын, уның һағыштарын, шатлыҡ-ҡыуаныстарын да һәм, әлбиттә, көйһөҙ-моңһоҙ йәшәй алмаҫын да... Уның етеҙ бармаҡтары баян телдәренән еңелсә генә йүгереп үтеүгә илаһи бер көй барлыҡҡа килә лә барыһын да үҙе әйтеп бирә.
Илназ Илнур улының ижады менән илештәр яҡшы таныш. Күркәм сара йыр, гармун моңо менән үрелеп барҙы. Был кистә Зилә Шәкирйәнова алып барыуындағы моң эйәһенең ижадташ дуҫтары, Татарстандың атҡаҙанған артисы, композитор Азат Имаев, йәш йырсылар Фәнис Яхин, Айҙар Фәтхетдинов, Айгөл Шакирова, Фидан Мөлөков, Айһылыу Мөсәлләмова, Сулпан Ғәниева, Денис Мөхәмәтдинов, Ришат һәм Айгөл Шәйхетдиновтар, Илдар Хайбрахманов, Элиза Әхмәтованың сығыштары концерттың сағыу биҙәге булды. Кисәне музыкаль яҡтан баянсы-композитор Илнар Ғилманшин һәм Тимур Садиҡов биҙәне. Тамашасылар Ләлә Шакирова етәкселегендәге “Йәшлек”, “Free Dance” бейеү төркөмөнөң сығыштарын ҡарап кинәнде, моң тулҡындарында йөҙҙө.
Илназ Мөсәлләмовтың сығышын тамашасы һоҡланып тыңлап ултырҙы, һәм һәр кемдең йөрәгендә Илеш еренең таланттарға бай булыуы тағы бер тапҡыр ғорурлыҡ хисе уятты.
Йәш музыканттың бөгөнгө уңыштары – әле шишмә башы ғына... Уның ижад сығанағы ҡоромаһын, саф булып, тулы булып гөрләһен дә гөрләһен.