Биҙрәләп ҡоямы ни! Бүреҡаҙған ауылына етәрәк, шаулап яуған ямғырҙан барыһы ла ҡаса, шуға күрә һабантуй ҡайғыһы ла юҡтыр халыҡта, тип машинаны туҡтаттым. Әммә эргәнән туҡтауһыҙ гөжләп үткән автомобилдәр, киреһенсә, байрамдың ҡыҙғандан-ҡыҙа барғанына үҙе үк ишара ине.
…Сәхнәгә ғорур ҡиәфәттә ауыл эшсәндәре, етәкселәр күтәрелә. Ә ғорурланырға хаҡтары бар – ил именлеге улар иңендә бит! Шуға Стәрлетамаҡ районы хакимиәте башлығы Раэль Рәхмәтуллиндың ҡулынан бүләктәр, диплом-рәхмәт хаттары алғанда тамаша ҡылыусылар ҙа эстән генә тәбрик итмәй, туйындырыусыларҙың ҡулын күңелдән ҡыҫмай ҡалмағандыр. Бүләктәре һуң, бүләктәре: һыуытҡыс, телевизор, ҡиммәтле һауыт-һаба, хатта иң тырыштар, атап әйткәндә, донъяларын ялт итеп тотҡан биләмәләр әллә нисәмә миллион һум торған трактор-экскаваторҙарға ла эйә булды. Бындай кимәлдә тәбрик итеүҙән һуң нисек тырышып эшләмәйһең инде?!– Ниһайәт, сәсеү тамам, яҙғы мәшәҡәт артта ҡалды. Әммә бойҙай өйөмдәрен кисеп йөрөр алдынан башҡараһы эш күп әле беҙҙең. Барыбыҙға ла уңыштар теләйем. Һабантуйҙа рәхәтләнеп күңел асығыҙ – был һеҙҙең байрам! Бөгөн бер уңайҙан икеләтә шатлыҡ: һабантуй һәм ямғыр байрамы! – тине Раэль Әҙһәм улы. Теләктәргә Өфөнән килгән ҡунаҡтар ҙа ихлас ҡушылды. Артабан ял итеүселәрҙе уйындар, күңел асыуҙар көтөп алды.
Мәҫәлән, кемдәрҙер ҡолға башына үрмәләп ҡараны, кемдәрҙер арҡан тартышты. Берәүҙәр туп типһә, икенселәр хатта һыуҙа балыҡ тотто. Әлбиттә, ҡармаҡ ярҙамында түгел, ә кескәй генә бассейнға тултырылған болғансыҡ һыуҙа. Бының менән генә тамамланманы һабантуй яңылыҡтары, турникта теп-теүәл 120 секунд аҫылынып тороп, бер мең һум аҡса отоусылар ҙа табылды. Ат сабышы, ҡатыҡтан тәңкә эҙләү, сатраш ярышы, тоҡ менән һуғыш, мәғариф бүлеге әҙерләгән балалар сығышы, китапханасылар ойошторған күргәҙмә, оҫта ҡулдарҙың ижади емештәре… – береһе лә ситтә ҡалманы. Шулай ҙа, һабантуй ҡанундарына ярашлы, халыҡты көрәш майҙаны нығыраҡ ылыҡтырҙы. Ни тиһәң дә, батырҙарҙы күҙәтеү – борон- борондан килгән бер илаһи күренеш ул. Кемдер яҡташын һынай, йәш ҡыҙҙар, әлбиттә, егет күҙләй, башҡалар иһә тәкә хужаһы кем булыр, тип түҙемһеҙләнеп көтә.
Уйын-көлкө район таланттарының урында ултырып түҙгеһеҙ дәртле бейеүҙәре, тыуған яҡтарына тартҡан һағышлы йырҙары менән үрелеп барҙы. Мәҙәниәт йылына арналған сығышты тамашасы алҡыштарға күмде. Нисек кенә булмаһын, рухи аҙыҡ менән генә тамаҡ туймай бит – ҡунаҡтар һығылып ултырған өҫтәлдәрҙә һыйланды, шашлыҡ ашап, ҡымыҙ эсеп кинәнде.…Һабантуй үтте, халыҡ йәнә эшкә сумды. Тик күңелдә онотолмаҫ бер хис уйылып ҡалды: нисек кенә булмаһын, эштә лә, ялда ла берҙәм беҙ, дуҫ-татыубыҙ. Тимәк, бәхетлебеҙ! Ә бәхетленең игене лә уңыр, икмәге лә булыр, моңо ла ташып торор…