Киң далалы Хәйбулла яҡтарында “Башҡортостан” журналистарының гәзит уҡыусылар менән үткән сираттағы осрашыуы Аҡъяр ауылы мәҙәниәт йортонда ойошторолдо. Райондың башҡорт теле һәм әҙәбиәте уҡытыусылары, китапхана һәм мәҙәниәт хеҙмәткәрҙәре, урындағы ҡоролтай етәкселәре, рухлы һәм зыялы аҡһаҡалдар ҡатнашлығындағы сара, Илмир Ибраһимов башҡарыуындағы “Башҡортостан” йыры менән башланып, күңелдәргә рух һәм дәрт өҫтәне.
Республика баҫмаһына яҙылыусылар һанын арттырыу маҡсатында ойошторолған сараны асып, район хакимиәте башлығының социаль мәсьәләләр буйынса урынбаҫары Миңзәлә Баймырҙина бындай осрашыуҙарҙың халыҡ өсөн файҙалы булыуын билдәләне.
— Хәйбулла районында “Башҡортостан”ды яратып уҡыйҙар, — тип башланы һүҙен Миңзәлә Ғөбәйҙулла ҡыҙы. — Бигерәк тә районыбыҙ хаҡындағы сығыштар, уның эшсән һәм тырыш халҡы тураһындағы һүрәтләмәләрҙе күҙәтеп барабыҙ. Киләсәктә лә хәйбуллаларҙың тормошон яҡтыртҡан мәҡәләләр гәзитте биҙәр тигән өмөттәбеҙ. Әле Бүребай тау-байыҡтырыу комбинаты етәкселеге үҙ эшселәренә 50 дана, район эшҡыуарҙары Фәрит Күскилдин менән Алһыу Байғусҡарова хеҙмәткәрҙәре өсөн гәзиткә яҙҙырыуҙы ойошторған. Үҙенең 95 йыллығын билдәләргә йыйынған “Башҡортостан” гәзите һәр кемдең яратып уҡыған баҫмаһының береһенә, яҡын дуҫына әүерелер тигән өмөттә ҡалам.
Һине аңлаған, кәрәк саҡта тәнҡитләп, үҙ һүҙен әйткән дуҫтар барында тормош күңелле лә, матур ҙа. Шуныһы һөйөндөрҙө: Хәйбуллала дуҫтарыбыҙ байтаҡ булып сыҡты, улар үҙҙәренең уй-теләктәрен асыҡтан-асыҡ еткерә алды. Уфимка ауылынан Фәриҙә Әбсәләмова, Аҡъяр ауылынан Айҙар Ҡоҙабаев, “Хәйбулла хәбәрҙәре” гәзитенең баш мөхәррире Сәлимә Байгилдина, Әнүәр Аслаевты гәзиттә тәнҡиткә аҙ урын бирелеүе, юғары вазифа биләүселәрҙең ваҡытлы матбуғатҡа яҙылмауы, ошондай осрашыуҙарҙың кәрәклеге, журналистарҙың халыҡ араһында йышыраҡ йөрөргә тейешлеге тураһындағы һорауҙар борсоно.
Башҡортостандың атҡаҙанған артистары Азат Биксурин менән Филүс Ҡалмырҙин башҡарыуындағы ҡурай моңдарын һәм йырҙарҙы халыҡ яратып ҡабул итте. Хатта дәртле ҡурай көйөнә бейергә төшөүселәр ҙә булды. Ғөмүмән, ике яҡ өсөн дә файҙалы осрашыуҙың һөҙөмтәһе булыр тигән ышаныс менән таралышты һәр кем.

* * *
Йәнтеш ауылындағы осрашыуға ла халыҡ күп йыйылғайны. Райондың урман зонаһына ҡараған халыҡтың – үҙ фекере, үҙ талаптары. Мәҫәлән, Әбеш ауылында йәшәүсе Камил Илембәтов:
— Ғүмер буйы уҡыған “Башҡортостан”ға яҙылмай ҡалһам, дуҫыма хыянат иткәндәй тойола, — тине үҙ сығышында. — Тик гәзиттә уҡымлы әйберҙәр күберәк булһын. Гөлсирә Ғиззәтуллина, Фәрзәнә Аҡбулатоваларҙың хикәйәләрен йышыраҡ баҫтырығыҙ.
Йәнтеш урта мәктәбе директоры Юлай Сынбулатов уҡытыусылары өсөн гәзиттең файҙаһы ифрат ҙур булыуын һыҙыҡ өҫтөнә алһа, ауылдың ағинәйе, сәсәниә Фәниә Арыҫланова, “Башҡортостан” гәзитенә арнап, үҙе сығарған мәҙхиәне уҡып ишеттерҙе. 26 йыл Йәнтеш ауылында почтальон булып эшләгән Ғәйниса Ҡуранғолова ауылдаштарын гәзиткә әүҙемерәк яҙылыра өндәне.
— Теләге булған һәр кем, хаҡына ҡарамай, гәзит-журналдарға яҙыла. Хәҙер ауыл ерендә лә хөрт йәшәүселәр юҡ тиерлек. Әммә кешеләрҙең битарафлығы, үҙенең халҡына, теленә ҡарашы аптырауға һала. Халыҡ гәзит-журналдар уҡымай тип әйтә алмайым, киреһенсә, улар почтаның килеүен көтөп ала. Йәнтештәр ваҡытлы матбуғатҡа күберәк яҙылыр, тип ышандыра алам, — тине Ғәйниса Динислам ҡыҙы.
Шуныһы ҡыуандырҙы: Ғәйниса Ҡуранғолова “Башҡортостан” гәзите ойошторған тилбер почтальондар араһында үткәрелгән бәйгелә ҡатнашырға ризалығын белдерҙе. Үҙ эшенең оҫтаһы, тәжрибәле почтальон бәйге еңеүсеһе булмаҫ тимә! Шулай уҡ Йәнтеш урта мәктәбе директоры Юлай Сынбулатов, мәҙәниәт йорто директоры Лена Ултыраҡова ла тотош коллектив менән “Башҡортостан”ды алдағы йылдарҙа ла алдырасаҡбыҙ, тип вәғәҙә бирҙе.