Уларҙың беренсеһен — райондың Шишмә ауылындағы модель клубын ҡараныҡ. Бындай атамаларҙы йыш осратырға тура килмәй. Модель, тимәк, өлгөлө. Ошо бәләкәй генә ауылда өлгөлө клубмы? Ҡәҙимге ҙур булмаған бинаны күрербеҙ тиһәк, ауыл өсөн мөһабәт һаналған клуб ҡаршы алды. Тышы бер хәл, эстә лә һоҡландырған күренештәр күп. Беренсенән, һәр төрлө түңәрәктәрҙең күплеге, икенсенән, улар өсөн тәғәйенләнгән бүлмәләрҙең зауыҡ менән биҙәлеше. Хатта стеналарының төҫө, биҙәү әйберҙәре ҡулланылышы буйынса ла бер бүлмә икенсеһен ҡабатламай. Йыһаздар тураһында ла шуны уҡ әйтергә мөмкин.
— Нисек, тәьҫир итәме? — тип һорай Азамат Ғилманов. “Ныҡ тәьҫир итә!” – тип уның һымаҡ өҙә яуап бирергә тырышам.
Бөтә был ҡорамал һәм йыһаздар күрһәтер өсөн генәлер тигән уй башҡа ла инеп сыҡмай, сөнки һәр ҡайҙа – балаларҙың әүҙем эшмәкәрлеге һөҙөмтәһе: ҡул эштәре, төшөргән һүрәттәре, йыр һәм бейеү коллективтарының сығыш яһағандағы фотолары... Ниндәй генә һын юҡ та ниндәй генә шөғөл ҡыҙыҡһындырмай бәләкәстәрҙе... Был түңәрәктәргә Шишмә урта мәктәбе уҡыусыларының 80 проценты самаһы йөрөй икән (ә мәктәптә 76 бала уҡый тинеләр). Үҙешмәкәр сәнғәт коллективтары ғына ла бында бишәү, балаларҙыҡы ла, ололарҙыҡы ла.
Шишмә модель клубы — Дүртөйлө районында өлгөлө учреждение. Район етәкселеге тап ошо клубта кластер алымын һынап ҡарарға булған. Муниципаль мәҙәниәт учреждениеларына ҡарата кластер алымы нимәнән ғибәрәт? Ул бер урында бөтә кәрәкле хеҙмәтләндереү төрҙәренең тупланыуын аңлата. Һүҙ мәҙәни хеҙмәт күрһәтеү тураһында бара, әлбиттә.
Маҡсат — халыҡтың мәҙәни ялын ойоштороуҙы махсуслашҡан белгестәр ҡарамағына тапшырыу. Шишмә ауыл мәҙәниәт йортон капиталь ремонтлау һәм эске яғын биҙәү өсөн 1 миллион 300 мең һумдан ашыуыраҡ аҡса тотонғандар. Ижади кадрҙар һаны бында туғыҙ берәмеккә етәсәк, түңәрәктәр үткәрергә күрше Исмаил ауылындағы сәнғәт мәктәбе уҡытыусылары ла йәлеп ителгән.
Ә ниңә өлгө итеп Шишмә ауылы һайланған? Мәҙәниәт йортоноң ял саралары ойоштороу өсөн майҙаны етерлек, тышҡы биләмәһе лә спорт һәм уйын майҙансыҡтары булдырыу мөмкинлеген бирә. Китапханаһы ла бай, ул да модель учреждениеһы итеп үҙгәртелә.
— Фойе әле, күрәһегеҙ, буш — бында ғаиләләр ҡыш көнө килеп ял итә алһын өсөн балалар майҙансығы, “йәнле тәбиғәт” мөйөшө буласаҡ, күтәрмә милли стилдә үҙгәртеп ҡороласаҡ. Белгестәрҙең эш хаҡын арттырыу юлдарын да эҙләйһе бар әле, — ти Азамат Хәмитйән улы. — Бында халыҡ та бик дәртле, модель клубы өсөн урын һайлағанда шуны ла иҫәпкә алдыҡ. Ә хыялым тулыһынса тормошҡа ашҡан урын – Йәштәр үҙәге, әйҙәгеҙ, барып ҡарайыҡ.
Дүртөйлө ҡалаһындағы Йәштәр үҙәге был яҡта мәҙәниәт өлкәһенә иғтибарҙың юғары кимәлдә булыуына тағы бер ҡат инандырҙы. Күп йүнәлешле үҙәктә өс үлсәмле (3D форматында) фильмдар күрһәтерлек заманса аппаратура ҡуйғандар. Элек кинотеатр булған бина уҙған йыл май айында ғына үҙгәртеп эшләнгән.
Был төбәктең мәҙәни ҡаҙаныштары тураһында күп һөйләргә була. Һуңғы йылдарҙа барлыҡҡа килгән этно-экотуризм үҙе генә лә ни тора! Тағы ла шуныһы: бөтә нәмәнең иҡтисади нигеҙгә ҡоролоуын иҫәптә тотоп, райондың мәҙәниәт учреждениелары табыш алыу юлдарын эҙләү һәм файҙаланыу мөмкинлектәрен дә онотмай. Былтыр улар халыҡҡа 8 миллион 548 мең һумлыҡ түләүле хеҙмәт күрһәткән. Килемдең төп өлөшө түңәрәктәр, дискотекалар үткәреүгә, кинофильмдар күрһәтеүгә, төрлө күмәк сараларға тура килә.