Сеңгер-сеңгер
Сыңлай көмөш сулпылар.
Һәр сулпыла моңло йырҙың,
Йә бейеүҙең уты бар! —
ти “Тамыр” балалар вокаль ансамбле йырсылары. Ырым буйынса, сулпы сыңы хатта яуыз көстәрҙе ҡасырыр булған. Бындай ерҙә, тимәк, тик яҡшылыҡ, матурлыҡ йәшәгән.

“Тамыр” балалар һәм үҫмерҙәр каналының “Сулпылар” тапшырыуы ла күңелдәргә изгелек, яҡтылыҡ өләшеү юлында. Тамашасыларҙы 20 йылдан ашыу ҡыуандыра бит ул: уй-ниәте аҡ булғас, сағыулығына күҙ теймәй — көмөш сыңы һаҡлап тора. Йылдан-йыл көслөрәк, моңлораҡ яңғырай үҙе, сөнки “Сулпылар” телевизион бәйгеһендә ҡатнашырға теләүселәр артҡандан-арта. Каналдың директоры Гөлназ Ҡолһарина әйтеүенсә, быйыл унда республиканың район һәм ҡалаларынан 230-ҙан ашыу бала көс һынашҡан. Һәләтлеләр араһынан 12-һе иң-иңдәре булып танылған. Яңы йыл алдынан еңеүселәр Өфөгә саҡырылып, хөрмәтләп тәбрикләнде. Уларға республикабыҙҙың билдәле кешеләре бүләк тапшырып, изге теләктәрен әйтте.
— Йыл дауамында һеҙҙең сығыштарығыҙҙы ҡарап, талантығыҙға һоҡланып, “ҡайһылай һәләтле, уңған балалар үҫеп килә” тип ғорурланып ултырҙыҡ. Тиҫтерҙәрегеҙгә өлгө булып тораһығыҙ. Киләсәктә лә йыр-моңдан айырылмағыҙ, яҡшы кешеләр булып үҫегеҙ, — тине йәш еңеүселәргә “Әсә йөрәге” төбәк ойошмаһы етәксеһе Гөлшат Ибраһимова.
Башҡа өлкәндәр ҙә балаларға иң изге теләктәрен еткерҙе, эшһөйәр, тырыш, илһөйәр, телһөйәр булырға саҡырҙы. “Киләсәктә һеҙҙе киң билдәле сәхнә оҫтаһы итеп күрергә теләйбеҙ”, — тине улар.
Еңеүселәрҙең һәр береһенә ҡиммәтле бүләктәр, дипломдар тапшырылды. Төп бүләккә Ейәнсура районынан Айтуған Ҡарабаев лайыҡ булды.
— Айтуған бәйге башланған көндәрҙән үк тамашасыларҙың иғтибарын яулағандыр, — тине еңеүсене тәбрикләп Рәсәйҙең атҡаҙанған, Башҡортостандың халыҡ артисы Нәзифә Ҡадирова. — Халыҡ йырҙарын да ифрат матур, моңло итеп башҡара ул. Һәләтеңде үҫтереүҙән туҡтама, Айтуған! Алдағы ғүмер юлың йырлы-моңло булһын!
Тамашасылар һөйөүен яулаған бәйгесе лә билдәләнде. Ул — Сибай ҡалаһынан Руфина Илбулова. Ҡыҙға бүләк тапшырған Флүрә Мурзина, Башҡортостан юлдаш телевидениеһының билдәле дикторы, тамашасы һөйөүен яулауҙың айырыуса ҙур ҡаҙаныш булыуын билдәләне.
“Сулпылар-2013” конкурсының барлыҡ еңеүселәрен алда тик уңыштар көтһөн, көмөш сың уларҙы ғүмер буйына һаҡлап йөрөһөн, яңынан-яңы үрҙәргә, матурлыҡҡа әйҙәһен, тип теләйек.


Марсель ҠАРАБАЕВ, еңеүсе Айтуғандың атаһы:
— Улыбыҙ өс йәшенән йырланы. Телевизорҙан, радионан яңғыраған моңдо тиҙ генә отоп ала ла көйләп йөрөй торғайны.
Беҙ — Самаҙы ауылынан, әммә балаларыбыҙ Абҙанға йөрөп уҡый. Мәктәпкә барған йылда халыҡ йырын башҡарып, район конкурсында беренсе урынды яуланы. “Сулпылар”ҙа еңеү иһә һис көтөлмәгәнсә килеп сыҡты, ғаиләбеҙ өсөн ҙур шатлыҡ булды. Ойоштороусыларға ҙур рәхмәт!
Айтуған йырлап ҡына йөрөмәй, һүрәт төшөрөргә оҫта, техника менән мауыға. Берәй музыка ҡоралында уйнарға өйрәнергә теләге ҙур. Хужалыҡта беҙгә ҙур ярҙамсы ла ул, барлыҡ эште теләп, оҫта башҡара.