Өфөлә Башҡортостан Композиторҙар союзының сираттағы отчет-һайлау йыйылышы уҙғарылды. Уның эшендә республиканың мәҙәниәт министры Әминә Шафиҡова һәм Рәсәй Композиторҙар союзының яуаплы секретары Ширвани Чалаев ҡатнашты.

Сарала профессор, З. Исмәғилев исемендәге Өфө дәүләт сәнғәт академияһының композиция кафедраһы мөдире, Рәсәйҙең һәм Башҡортостандың атҡаҙанған сәнғәт эшмәкәре, Д.Д. Шостакович исемендәге премия лауреаты Ләйлә Исмәғилева республикабыҙҙағы Композиторҙар союзы рәйесе вазифаһына һайланды.
Ләйлә Исмәғилева Мәскәүҙә тыуған. 1972 йылда Гнесиндар исемендәге Дәүләт музыка-педагогия институтының композиторҙар факультетын тамамлаған һәм шул осорҙан алып Өфө дәүләт сәнғәт академияһында эшләй. 1990 – 1992 йылдарҙа – сәнғәт институтының ғилми эш буйынса проректоры, 2004 йылдан – композиция кафедраһы мөдире. “Хужа Насретдин”, “Арҡайым” балеттары, симфоник һәм камера, вокаль-инструменталь әҫәрҙәр, театраль тамашаларға музыкалар авторы, З. Исмәғилев исемендәге Халыҡ-ара конкурстың художество етәксеһе.