Өфөнөң “Мираҫ” фольклор ансамбле Ҡаҙағстандың төп сәхнәһен дер һелкетеп ҡайтты. Ә инде Өфө ҡалаһы хакимиәте башлығы урынбаҫары Сынтимер Баязитов етәкселегендәге рәсми делегация Астанала эшлекле һөйләшеүҙәр алып барҙы.

Билдәле булыуынса, быйыл Астана менән Өфө ҡалалары араһындағы дуҫлыҡ һәм хеҙмәттәшлек тураһында килешеүгә ҡул ҡуйылғайны. Беҙҙең ижади коллективтың ҡаҙаҡ ерендәге тәүге концерты — туғандарса бәйләнештең сағыу миҫалы.
Әйткәндәй, “Мираҫ” ансамбле күптән инде баш ҡалабыҙҙың йөҙөк ҡашына әйләнгән. Рәсәйҙә генә түгел, Франция, Испания, Италия, Португалия, Бельгия, Германия, Төркиә кеүек илдәрҙә сығыш яһап, тыуған яғыбыҙҙың мәртәбәһен арттырҙы ул.
Астаналағы концертта “мираҫ”тар республикабыҙҙың күп милләтле мәҙәниәтен сағылдырҙы. Улар башҡарыуындағы урыҫ, башҡорт, татар, төрөк, мари, удмурт, украин, абхаз, сыуаш халыҡтарының йырҙары һәм бейеүҙәре берәүҙе лә битараф ҡалдырманы. Беҙҙекеләр Ҡаҙағстанға үҙенсәлекле “күстәнәс” тә алып барғайны: улар башҡарыуында “Ҡайындар” тигән ҡаҙаҡ бейеүен залдағылар дәррәү алҡыштарға күмде.