Нәсих Хәлисовты дуҫтары, яҡындары рәссамлыҡтан бигерәк балыҡсы тип белә. Саҡ ҡына буш ваҡыты табылдымы, ҡырға, һыу буйына сыға ла китә ул. Ҡомарлы булғанға түгел, ә тәбиғәтте яратҡанға.

Бишенсе класта уҡығанда уҡ “Сме­на” аппараты менән фото төшөрөргә әүәҫләнгән Әбйәлил егете Өфө­ләге мәктәп-интернатҡа килгәс тә тә­биғәт балаһы булып ҡала, һәр ерҙә матурлыҡты, үҙенсәлекте кү­реп, кадрға теркәп йөрөй. Баш­ҡорт дәүләт педагогия инс­ти­тутының художество-графика факультетын тамамлағандан һуң күп тә үтмәҫтән республика матбуғатында эшләй башлай, бар көсөн, ижади ҡеүәтен ошо тар­маҡ­ҡа ба­ғышлай, ләкин яратҡан шөғө­лөнә лә хыянат итмәй. Йәшә­йештең төрлө мәлдәре – ҡы­ҙы­ғы ла, ҡыҙ­ғанысы ла – Нәсихтең объективына эләгеп кенә тора. Бөгөн уның иҫ киткес бай фотоархивында ниҙәр генә һаҡланмай!
Һөнәри эшмәкәрлегенә килгән­дә, Нәсих Хәлисовты Баш­ҡорт­ос­тандағы исемле йыл­дарҙың етеһенең эмбле­ма­һын ижад иткән талантлы рәссам булараҡ республика халҡы яҡшы белә. Баш­ҡорт­ос­тандың үҙ ирке менән Рәсәйгә ҡу­шылыуының 450 йыллығына арналған эмблемаһы айырыуса киң танылыу алды. Төр­лө ойошмаларҙың, ведом­ство­ларҙың, сараларҙың билдәләре, йәғни логотиптары хаҡында әйтеп тораһы ла түгел. Бынан тыш, “Башҡортостан” гәзитендәге һәр фотоһүрәт ошо рәссамдың ҡулы, зиһене аша үтә, баҫманың биҙә­лешен яҡшыртыу йәһәтенән дә Нәсих Хәлисовтың хеҙмәте оло хуплауға лайыҡ. “Рә­сәйҙең атҡа­ҙан­ған мәҙәниәт хеҙмәт­кәре”, “Башҡортостандың атҡаҙанған матбуғат һәм киң мәғлүмәт хеҙмәткәре” кеүек маҡтаулы, абруйлы исемдәрҙе юҡҡа алмаған ул.
Әле Өфөнөң Дим биҫтәһендә урынлашҡан 112-се Башҡорт кавалерия дивизияһы музейының күр­гәҙмә залында Нәсих Хәлисовтың “Ҡабатланмаҫ мәл” тигән фото­күр­гәҙмәһе ҡуйылған. Авторҙың үҙен, дуҫтарын да саҡырып, музей етәк­селеге Өфөләге Ҡ. Дәүләткил­деев исемендәге республика художест­во гимназия-интернаты уҡыу­сыла­ры өсөн матур осрашыу ойош­торғайны. Балаларҙы Нәсих Хәлисовтың ижады һәм шәхесе менән таныштырырға балыҡсы һәм “балыҡсы” дуҫтары килде: “Башҡортостан” гәзитен уҡыусы­ларға ҡармаҡ һалыу серҙәрен өйрәтеүсе Әсләм Камалов; тормош күренештәрен “ҡәләм-ырғаҡ”­ҡа оҫта эләктереп, шәп әҫәрҙәр ижад итеүсе, шулай уҡ фәһемле фекерҙәрҙе ҡомарланып сүпләүсе әҙип Факил Мырҙаҡаев; халҡы­быҙ­ҙың көйҙәрен төрлө тәрәнлек­тәрҙән тартып сығарып, ҡурай моңона һалып, сәхнә аша тамаша­сыларҙы “һыйлаусы” Ишморат Ил­бәков; рухи донъябыҙҙағы иң мө­һим бурыстарҙы “һөҙөп алып”, дөйөм хөкөмгә тәҡдим итеп барған Альбина Исхаҡова, Наилә Буран­ғолова...
Былтыр Нәсих Хөббөтдин улы социаль селтәргә ике кило ярым­лыҡ балыҡ тотоп төшкән фотоһын ҡуйғайны. Быйыл шунан ике тап­ҡырға тиерлек ҙурыраҡты эләк­тергән. Фоторәссам булараҡ та йылдан-йыл еллерәк табыштарға юлығырға яҙһын уға!

Күберәк фотолар ошонда: фотолар