Ни сыҡһа, ошо М. Аҡмулла исемендәге Башҡорт дәүләт педагогия универси­тетының баш­ҡорт филологияһы факультетынан сыға. Йыл аҙағында улар, Наил Ғәйетбайҙың “Ауылға ҡыҙҙар килде” пьесаһын сәхнә­ләштереп, Өфө тамашасы­һын таң ҡалдырҙы. Әҫәрҙе М. Кә­рим исемендәге Милли йәштәр театры артисы Илнур Лоҡманов сәхнәгә алып сыҡты, тауыш ҡуйыусыһы — Илшат Зарипов, яҡтыртыусыһы Виталий Соколов булды.

Эштән һуң, йыл аҙағы бит инде, арып-талып, филологтар ролгә нисек ингәнен күрер өсөн барғайным. Ә улар барлыҡ икеләнеүҙәрҙе, йонсоғанды оноттороп, сәхнә тормошо менән йәшәтте. Мәстүрә әбей ролен башҡарған Зөлхизә Сәлихова бар ҡыланыш­тары менән ауыл әбей­ҙәрен хәтерләтте. Алға эйелеп йөрөүенә, башын сайҡай-сайҡай һөйләүенә ҡарап торһаң, йәш кенә ҡыҙ бала әбей сүрәтенә ингән тип уйламаҫһың да. Гәзитебеҙҙең авторы, әүҙем студент Гөлнур Хужәх­мәтова Рәйлә ролен шундай килештереп уйнаны, әйтерһең, ул тормошта ла уҫал, етәк­селек итергә яратҡан ҡыҙыҡай. Режиссер Илнур Лоҡманов йәштәрҙең күңел төпкөлөндә йәшеренгән һәләттәрен аса алған. Хәйбулла булып уйнаған Инсаф Хужабиргәновты күреп, бөтөнләй телһеҙ ҡала яҙҙым. Тыныс ҡына, әллә ни күҙгә ташланып та бармаған егеттең эсендә эйәр­ле-йүгәнле ат ята икән дабаһа! Ышандым мин, Инсаф-Хәйбулланың әйткәндәренә, ҡылыҡтарына! Илһам Теүәлбаев (Әмир), Азамат Нурғәлин (Әхтәм) кеүек егеттәр шулай уҡ ихласлығы, образдарын оҫта асыуҙары менән арбаны. Әлиә Әбдрәши­това (Нурания), Гүзәл Хаҡова (Кинйәбикә), Гүзәлиә Миңлебаеваларҙы (Ләйсән) бө­гөн­дән артист итеп сәхнәгә сығарыр­лыҡ!
Был ни хикмәт: режиссер шундай ма­һир­мы, әллә уҡы­тыусы ла артист бу­лырға һәм балалар алдында төрлө сү­рәткә инеп, алдына ҡуйған маҡсатына ирешергә, рухиәт орлоҡтарын сәсергә бурыслы тигән тәғлимәткә тоғро студенттар сыҡҡанмы майҙанға?! Нисек кенә бул­маһын, М. Аҡ­мулла исемендәге Башҡорт дәүләт педагогия уни­вер­ситетының “Ҡо­рос” фольклор-театр ансамбле Мәҙәниәт йылын уҡыу­ҙағы ҡаҙаныштары менән генә түгел, ә ижади балҡыш менән тамамланы. Әҙәбиәт йылына аяҡ баҫҡанда, башҡорт драматургының әҫәрен, бәлки, тағы ла сәхнәгә алып сығырһығыҙ, йәштәр?! Яңы­нан барып ҡарап, тағы ла һеҙ тыуҙырған миҙгелдәрҙә йәшәп алыр инек!