– Миҙхәт ағай, таныштырып китегеҙ әле үҙегеҙ менән. Ҡайһы яҡтың һыуҙа­рын эсеп үҫтегеҙ?
– Сығышым менән Благовар райо­нының Яныш ауылынан мин. Шунда 7-се класты тамамлағандан һуң Сибайға тө­ҙөлөш техникумына киттем. Унда мине күп нәмәгә, эшкә өй­рәт­теләр. Элекке Со­вет иленең һәр ғаиләһенә ҡағылған һуғыш еле беҙҙе лә урап үтмәне: атай яу яланында ятып ҡалды. Әсәйем һең­лем менән икебеҙҙе ауыр йылдарҙа ҡа­рап үҫтерҙе. Ыҙа сик­тек, тип зар­ла­нырға ярат­майым, әм­мә ул заман михнәт һур­паһын һәр кемгә эсергәндер инде.
Ҡатыным – Бүздәк районының Тө­рөш ауылынан, ул үҫтерҙек. Бөгөн ейәнс­әре­беҙҙең ҡыуаныстарын да ур­таҡ­лашып йәшәйбеҙ. Төҙөлөш буйын­са участка начальнигы булып пен­сия­ға сыҡтым һәм эшҡыуарлыҡ менән шө­ғөлләнә башланым. Эшҡыуар булып 2002 йыл­ға тиклем эшләнем.
– Ә йыр-моңға тартылыу ҡайҙан килә?
– Әсәйем Ғәзимә матур йырлай ине. Ир балаға атайһыҙ үҫеүе еңелдән түгел. Ана шул йөрәкте әрнеткән кисе­рештәр, йән һыҙланыуҙары ҡулыма гар­мун алыр­ға мәжбүр итте, үҙ алды­ма шиғырҙар яҙғы­ланым, көйҙәр сы­ғар­ҙым. Уҙған быуаттың 60-сы йыл­да­рынан уҡ килә был ынтылышым. Хаҡлы ялға сыҡҡас, ир­кенләп йәнем теләгән, бурысым тип һанаған эштәргә тотондом. Тыуған ауылымда мәсет һалдыҡ, зыярат­ты төҙөклән­дереп торабыҙ, районыбыҙға ярҙам итергә тырышабыҙ. Үҙнәшер юлы менән ике китап, өс аудиодиск, ике видеодиск сығарҙым. Халыҡ бик йылы ҡа­бул иткән һымаҡ тойолдо миңә йырҙа­рымды.
– “Дуҫлыҡ күпере”н кемдәр һалыш­ты?
– Дуҫлыҡ күперен һалышырға теләү­селәр күп икән ул, туғаным! Ошо көндәрҙә Ҡазандың Ғ. Туҡай исемен­дәге дәүләт филармония­һында “Дуҫ­лыҡ күпере” тип атал­ған йыр-моң ки­сәһе үтте. Унда йырҙарымды Баш­ҡортостанда тыуып үҫкән йырсылар башҡарҙы. Сараның сценарий авторы, координаторы билдәле йыр­сы, яҡта­шым, Благовар егете Рөстәм Аса­ев булды. Ул үҙе “Ҡазанға йыр”, “Универсиада”, ҡыҙы Гөл­наз Асаева Филүс Ҡа­һиров ме­нән дуэтта, айырым да “Ҡыҙ­ҙар китә”, “Елкәндәр” йырҙарын баш­ҡар­ҙы. Гүзәл Динекәева “Кем ғә­йепле?”, “Ҡоштар кеүек”, Фи­рүзә Па­риж “Өшөт­мәсе күңелде”, “Яҙмыш”, Марат Шәйбәков “Бала һағышы”, Бәширә Насирова “Төй­мә”, “Йәшәйһе килә” сәхнә әҫәрҙәрен та­ма­шасыға тәҡдим итте. Ирек Ноғоманов башҡарған “Әсә­йемә” йыры халыҡ тарафынан бик йылы ҡабул ител­де, уны ғәзиз кеше­мә бағышлап ижад ит­кәйнем. Кисәлә йәштәр ҙә һы­нау тотто – Илшат Вәлиев, Фәнит Ҡа­расурин, Ғәлиә Язданова зал­да­ғы­ларҙы үҙен­сә­лек­ле тауышы ме­нән әсир итте. Радик Юлъяҡ­шин башҡарған “Аш­ҡын­ма, ғүмер” йыры, хит-парадтар еңеү­сеһе булған кеүек, был тамашала ла халыҡ тарафынан яратып ҡабул ителде. Яҡ­таш­та­рын тәбрикләргә килгән Татар­стан­дың халыҡ ша­ғи­ры Роберт Миң­нул­лин, Та­тарстан­дың халыҡ ар­тис­тары Хә­ниә Фәрхи, Салауат Фәт­хет­ди­нов моң кисә­һенән бик ҡәнәғәт ҡалды.
Ябай ғына итеп аталған “Дуҫлыҡ күпере” ысын мә­ғә­нәһендә ике ту­ған­даш республика ара­һын­дағы электән килгән матур мө­нә­сә­бәттәрҙе нығытты. Татарстан Республикаһы­ның Дәүләт Советы Президиумы ағзаһы Рә­зил Вәлиев һәм Татарстан Яҙыусылар союзы рәйесе Рәфис Ҡорбановтың байрамда ҡат­нашыуы кисәгә мәртәбә өҫтәне. Баш­ҡорт­остан­дың халыҡ ша­ғи­ры Марат Кәримов, ғалим Рәйеф Әмиров, Благовар районы Советы секретары Наилә Сади­ҡова күрше­ләрҙә иң ҙур ҡунаҡ булды. Саҡырыуҙы ҡабул иткәндәре өсөн рәхмәт уларға! Шы­ғырым тулы зал йыя алыуы­быҙға ла бик ҡыуан­дым, күптән бындай кисә булғаны юҡ ине, тинеләр.
Башҡорт һәм татар халҡы элек-элек­тән үҙ-ара йылы мөнәсәбәт һаҡ­лап, тығыҙ бәйлә­неш­тә йәшәгән. “Өс көнлөк” донъяла беҙ­ҙең бүлешер малыбыҙ юҡ, бала­ла­рыбыҙға матур, имен тормош ҡалдырыу зарур. Ук­раина хәлдәре хаҡында һәр беребеҙ хәбәрҙар, Ер шарында һуғыш тын­маған, шуға күрә дуҫлыҡ, тыныслыҡ хаҡында көн дә йырлап, бер-бере­беҙҙең ҡәҙере ту­раһында һөйләп тороу һис зыян итмәҫ. Бергә һәм бер­ҙәм булһаҡ, әллә ниндәй замана ҡар­шылыҡтарын да еңеп сы­ғырбыҙ әле. Киләсәктә ошондай уҡ кисәне Өфөлә, Мәскәүҙә үткәрергә тигән уйыбыҙ бар.
– Ижади уңыштар һеҙгә, Миҙхәт ағай!