Тывала башҡорт яҙыусыһы Айгиз Баймөхәмәтов миҙал менән бүләкләнде

Башҡортостандың Яҙыусылар союзы рәйесе Айгиз Баймөхәмәтовты Тыва Республикаһының Чадан ҡалаһында «Алдар. Хүндү. Мөгейиг» миҙалы менән бүләкләнеләр. Исеме «Дан. Хөрмәт. Баш эйеү» тип тәржемә ителә. В. Көк-оол исемендәге Милли музыка-драма театрының 90 йыллыҡ юбилейына арналған миҙалды театр директоры Саян Монгуш тапшырҙы.

Айгиз Баймөхәмәтов Тываға үҙенең «Ҡалдырма, әсәй!» автобиографик повесы буйынса ҡуйылған «Хыялға ҡаршы» спектаклен ҡарарға барҙы. 90-сы юбилей театр миҙгеле ошо спектакль менән тамамланды.

«Спектакль тамашасыларҙың юғары баһаһын алды. Залда тынлыҡ урынлашты, барыһы ла тын да алмай ҡараны, — тип билдәләне Көк-оол исемендәге Милли театр директоры. — Спектаклдең тәрбиәүи әһәмиәте ҙур, ул сәхнәлә оҙаҡ йәшәйәсәк. Айгиз Баймөхәмәтовҡа әҙәбиәткә индергән өлөшө һәм беҙҙең версия менән ҡыҙыҡһыныуы өсөн рәхмәт белдерәбеҙ».