Башҡортостанда «Урал батыр» эпосы буйынса йәнһүрәт төшөрөлгән
Йәнһүрәттең премьераһы 2 сентябрҙә Ишембай мәҙәниәт һарайында була.
Йәнһүрәтте «Ишембайфильм» мультстудияһы командаһы төшөргән. Әле коллектив 3-сө серия өҫтөндә эшләй, тип хәбәр итте Ишембай районы хакимиәте башлығы Азат Ишемғолов социаль селтәрҙәге сәхифәһендә.
«Амбициялы проект өҫтөндә ижади команда – режиссер Фәнис Кәримов, рәссамдар Вера Шаригина, Ирина Окружнова, Радик Ишмөхәмәтов, Вера Фролова, дизайнер Вячеслав Федоров эшләй. «Уралом» йыры «Ну-ка все вместе!» вокаль шоуында ҡатнашыусы Ринат Сәлихйәнов башҡарыуында яңғырай», — тип билдәләне Азат Ишемғолов.
Йәнһүрәт авторҙары әйтеүенсә, экранда тамашасылар Ишембай районы халҡын күрергә мөмкин. Күп кенә персонаждар – мәҙәниәт бүлеге хеҙмәткәрҙәре һәм урындағы артистарҙың образдары.
