Өфөлә әҙәбиәт музейында Һәҙиә Дәүләтшинаның 120 йыллығына күргәҙмә асыла
Өфөлә Милли әҙәбиәт музейында «Башҡорт әҙәбиәте ынйыһы» күргәҙмәһе асыла. Ул бөйөк яҙыусы, Салауат Юлаев исемендәге премия лауреаты һәм Көнсығышта ҡатын-ҡыҙҙар араһында беренсе роман яҙған Һәҙиә Дәүләтшинаның тыуыуына 120 йыл тулыуға арнала.
Күргәҙмә 6 мартта Мәжит Ғафуриҙың йорт-музейында асыла. Ул әҫәрҙәре башҡорт әҙәбиәтендә мөһим урын биләгән Һәҙиә Дәүләтшинаның ижады менән таныштыра.
Экспозицияла китаптар, фотоһүрәттәр, шулай уҡ яҙыусының тормошо һәм эшмәкәрлеге менән бәйле үҙенсәлекле артефакттар тәҡдим ителә. Шулай уҡ сараға танылған романсыны күреп белгән яҙыусы Мөкәрәмә Садиҡова һәм Башҡортостандың халыҡ шағиры, Һ.Дәүләтшина исемендәге премия лауреаты Гүзәл Ситдыҡова саҡырылған. Күргәҙмә асылғандан һуң республиканың уҡыу йорттарында Һәҙиә Дәүләтшина ҡалдырған мәҙәни мираҫты тәрәнерәк аңлатыу өсөн тематик лекциялар һәм оҫталыҡ дәрестәре ҡаралған.
Әҙәбиәт һөйөүселәрҙе, студенттарҙы һәм тикшеренеүселәрҙе башҡорт әҙәбиәтенең сағыу донъяһы менән ентеклерәк танышырға, күренекле яҙыусының тормошо һәм ижады хаҡында күберәк белергә саҡыралар.