“500 ферма” программаһына ярашлы яңыртылырға тейешле 68 ферманың быйыл утыҙынсыһы файҙаланыуға тапшырылды. Ошо аҙнала ғына өс малсылыҡ комплексы сафҡа инде.
Асҡын районындағы “Ҡояштыр” ауыл хужалығы кооперативында 300 баш малға иҫәпләнгән һыйыр аҙбары төҙөкләндерелде һәм йыһазландырылды. Уларҙа асҡындар тоҡомло мал урынлаштырырға ниәтләй. Иглин районының “Агротех” яуаплылығы сикләнгән йәмғиәтендә ике һыйыр һәм быҙау аҙбары икенсе һулыш алды. Яңыртылған биналарҙа быйыл көҙ Финляндиянан килтерелгән айшир тоҡомло 154 баш һыйыр аҫрала. Уларҙың 12 быҙауы бар. Ферманы яңыртыу, шулай уҡ тоҡомло мал һатып алыу 40 миллион һумға төшкән. Сығымдың бер өлөшө — 12 миллион һум самаһы — төҙөлөш-монтаж эшенә, техника һәм ҡорамалдар һатып алыуға субсидия рәүешендә ҡапланған.