Ҡыҙыу осор яҡынлашты – айырыуса ауыл хужалығы эшсәндәре ошо ваҡытты файҙалы итеп үткәреүгә бар көсөн һала. Мәҫәлән, Дүртөйлө районының “Уңыш” яуаплылығы сикләнгән йәмғиәтенең уңған хеҙмәткәрҙәре йәйҙең бер көнө йылды туйҙыра тигән әйтемде онотмай.

– Төп маҡсат – малсылыҡты үҫтереү, был тармаҡтан мөмкин тиклем күберәк килем алыу, – тип һөйләй “Уңыш” хужалығы етәксеһе, Башҡортостандың атҡаҙанған ауыл хужалығы хеҙмәткәре Марат Ҡорбанов. – Беҙҙә бөтәһе 1 200 баш һыйыр малы бар, шуның өстән бер өлөшө – һауын һыйыры. Көтөү тәүлек әйләнәһенә ойошторолғас, һауым да юғары. Һөттө Дүртөйлө һөт комбинатына оҙатабыҙ.
Ғәҙәттә, бәғзе берәүҙәр ниндәй ҙә уй-ниәте тормошҡа ашмаһа, тәбиғәттең көйһөҙлөгөнә йәки ҡайҙандыр ярҙамдың булмауына һылтана. Марат Мәүләүи улы иһә бөтә уңыштың сере егәрлелектә, өлгөрлөктә һәм эште ойоштора белеүҙә икәнлеген билдәләне.