Районда йыл һайын яҙғы сәсеү тамамланғас, механизаторҙарҙың һөнәри оҫталығын асыҡлау маҡсатында “Һабансылар ярышы” ойошторола.

Быйыл сара “Нурлы” агрофирмаһында үтте. Унда төрлө хужалыҡтарҙан 12 механизатор һынау тотто.
Һабансылар йәрәбә һалып, билдәләнгән тәртип буйынса “МТЗ-82” тракторҙарында тәғәйен участкаларға йүнәлде. Ғәмәли күнекмәләр бураҙнаның тәрәнлеге, киңлеге, тигеҙлеге, һөрөнтө ерҙең тышҡы күренеше, тупраҡты әйләндереп һалыу сифатын тикшереүгә ҡоролғайны. Ваҡытҡа һөрөү талабы ҡуйылманы. Ярыш көсөргәнешле барҙы, һабансылар һәр талапты теүәл үтәргә тырышты.
Ниһайәт, еңеүселәр билдәләнде. “Һуҡайлы” кооперативынан Илдар Ишекәев үҙенең маһирлығын тағы бер ҡат иҫбатланы. Оҫта һабансы тиҙҙән Краснодар крайында ойоштороласаҡ Бөтә Рәсәй һабансылар конкурсында ҡатнашасаҡ. Икенсе урынды Салауат исемендәге кооперативтан Владимир Григорьев яуланы, “Ашҡаҙар” хужалығы механизаторы Сергей Фролов өсөнсө булды.