Өфө районының Зубов ауылында ит эшкәртеү цехы асылды. “Фермерҙарҙың ит сәнәғәте компанияһы” яуаплылығы сикләнгән йәмғиәтенең башланғысына ярашлы булдырылған был предприятие Башҡортостандың ауыл хужалығы етештергән итте ҡабул итеүгә иҫәпләнгән һәм өҫтөнлөклө инвестиция проекттарын тормошҡа ашырыуҙа һәйбәт миҫал булып тора.– Компанияның был проектына “өҫтөнлөклө” тигән статус былтыр апрелдә бирелгәйне, – тине республиканың иҡтисад министры Сергей Новиков завод менән танышҡанда. – Эш йүнәлеше билдәләнгән, күләм асыҡланған. Компания күрһәткестәр артынан ҡыумай, бында иң мөһиме – урындағы баҙарға йөҙ тотоу. Предприятие биш ай эсендә булдырылды. Был хатта Ҡытай эшҡыуарҙары кимәленә һәм үлсәмдәренә лә тура килеп ҡуя. Әйткәндәй, был осраҡта барлыҡ йөкләмәләр ҙә үтәлде – инвестиция буйынса ла, яңы эш урындары асыуҙа ла.
Инвестицияның дөйөм күләме 100 миллион һумдан ашҡан, социаль йоғонтололоғо ла һиҙелерлек – 153 яңы эш урыны барлыҡҡа килгән. Компанияның генераль директоры Алексей Израйлев аңлатыуынса, әлеге мәлдә төҙөү-ҡороу эштәре тулыһынса тамамланған, ит әҙерләү, эшкәртеү һәм төрөү цехтарында ҡорамалдарҙы эшләтеп ҡарағандар. Бында айына 150 тонна һыуытылған сусҡа һәм һыйыр ите, төрлө тултырма, сосиска һәм сарделька етештереүгә иҫәп тоталар, ә йылына 1 690 тоннаға саҡлы ит һәм тултырма эшләп сығара аласаҡтар.
Әҙер продукция “Фермер ите” сауҙа селтәрендә һатыла башлаған да инде. Бөгөнгә ошондай ун кибет эшләй. Киләһе йыл аҙағына саҡлы компания Өфөлә һәм республика райондарында 40-ҡа яҡын сауҙа нөктәһе асыуҙы планлаштыра. Шулай уҡ был продукцияны райондарға махсус автолавкалар менән алып барып һатырға ла вәғәҙә итәләр. Артабан итте урындағы сауҙа селтәрендә һәм йәмәғәт туҡланыуы предприятиеларына һатыу ҙа күҙ уңында тотола.
Башҡортостандың аграр сәнәғәт тармағында бөтәһе 36 өҫтөнлөклө инвестиция проекты тормошҡа ашырыла. Уларҙың дөйөм инвестиция күләме 61,4 миллиард һумға етергә һәм өҫтәмә рәүештә 5,9 мең эш урыны барлыҡҡа килергә тейеш.
Бөгөн аграр сәнәғәт тармағында инвесторҙарға һалым ташламалары, сауҙалашыу үткәрмәй генә ер майҙанын ҡуртымға биреү, ҡорамалдар һатып алыуҙа субсидия бүлеү, кредит буйынса ставканы кәметеү рәүешендә дәүләт ярҙамы күрһәтелә. Бынан тыш, инвестиция эшмәкәрлеге берәмектәренә ярҙамдың яңы төрҙәре индерелә: күләме 10 миллион һумдан алып 100 миллион һумға саҡлы булған инвестиция проекттарын тормошҡа ашырған предприятиеларҙың мөлкәтенә һалым, өҫтөнлөклө проекттарҙы ғәмәлгә индереү маҡсатында төҙөлә башлаған инфраструктура объекттарын һалыуҙа сығымдың бер өлөшөн ҡаплау.