Инвестиция мөхитен яҡшыртыу буйынса сессия уҙҙы.
Өфөлә яңы проекттарҙы тормошҡа ашырыу буйынса стратегик инициативалар агентлығының (АСИ) стратегик сессияһы үтте. Был сара республикалағы инвестиция мөхитен яҡшыртыуға арналды.
Сессияла Башҡортостан Башлығы вазифаһын ваҡытлыса башҡарыусы Радий Хәбиров аныҡ бурыстар ҡуйҙы.
АСИ командаһынан Инвестиция мөхитен үҫтереү департаменты етәксеһе Виталий Храмушин, Агентлыҡтың Волга буйы федераль округындағы вәкиле Сергей Бочаров, Инвестиция мөхитен яҡшыртыуҙың маҡсатлы моделдәрен тормошҡа ашырыу идаралығы етәксеһе Марат Фәттәхов, Төбәк үҫеше департаментының төбәктәр селтәренә ярҙам идаралығынан Александр Везиров һәм башҡалар сығыш яһаны. Башҡортостандан сессияла Хөкүмәт Премьер-министры Рөстәм Мәрҙәнов, республиканың иҡтисади үҫеш министры Сергей Новиков, башҡарма власть органдары, эшҡыуарҙар һәм эксперттар йәмғиәте вәкилдәре ҡатнашты.
– Беҙҙең республикала инвестициялар менән шөғөлләнгән тәғәйен генә ойошма юҡ, – тине Радий Фәрит улы. – Ә был йүнәлеш бөтә иҡтисадҡа йоғонто яһаған шарт булып тора. Башҡортостанда ошо эшмәкәрлек менән системалы шөғөлләнгән ведомство булдырайыҡ.
– Рәсәй төбәктәрендәге инвестиция мөхите буйынса милли рейтингта республиканың ҡайһы бер күрһәткестәре түбәнәйҙе, ҡуйылған маҡсаттарға ирешә алмау хәүефе тыуҙы. Инвесторҙы йәлеп итеү өсөн ныҡлы эшләргә кәрәк. Шул турала ла уйланайыҡ, – тине Рөстәм Мәрҙәнов.