Башҡортостанда ҡош киҙеүе таралыу хәүефе бармы? Айырыуса хәүефле һәм карантинлы, шул иҫәптән кеше һәм хайуандар өсөн дөйөм сирҙәрҙең барлыҡҡа килеүен иҫкәртеү мәсьәләләре буйынса ведомство-ара комиссияның сираттан тыш ултырышында ошо мәсьәлә ҡаралды.

Республика ауыл хужалығы министры Илшат Фәзрахманов билдәләүенсә, әле төбәктә хәл ярайһы уҡ ҡатмарлы.
– Ҡош киҙеүе теркәлгән төбәктәр беҙҙе уратып алған. Бының хәүефен барыһы ла яҡшы аңлай. Былтыр ике районда бешмә сире теркәлгәйне. Зыян күләме 50 миллион һум тәшкил итте. Шул уҡ ваҡытта ошоға бәйле сығымдар әле булһа бар, – тине ул.
Министр әйтеүенсә, Башҡортостан буйынса Эске эштәр министрлығының ЮХХДИ хеҙмәткәрҙәре менән берлектә республикалағы төп автомобиль юлдарында биш ветеринария посы ойошторолдо. Уларҙа тәүлек әйләнәһенә дежурлыҡ алып барыла.