Йырҙарҙа ауылды маҡтаһаҡ та, ысынбарлыҡта хәл шәптән түгел. Балалар мәктәпте бөтөр-бөтмәҫтән ҡалаға уҡырға китә һәм шунда төпләнеүҙе хуп күрә.
Һуңғы 25 йылда Рәсәйҙә 34 мең ауыл юҡҡа сыҡҡан, 20 меңендә ни бары һигеҙ-ун кеше йәшәй. 95 мең самаһы ауылға һаман “зәңгәр яғыулыҡ” етмәгән, 43 меңендә телефон бәйләнеше юҡ, 30 меңдән ашыу ауылда асфальт юл һалынмаған. Ҡулайлаштырыу һөҙөмтәһендә биш мең участка дауаханаһынан – биш йөҙ 49 мең мәктәптән – 23 мең, 41 мең балалар баҡсаһынан ете мең ҡалған.