Санкт-Петербургта Рәсәйҙең иң яҡшы ун моноҡалаһы иғлан ителде. Исемлектә Башҡортостандың Күмертау ҡалаһы ла бар.
Хәтерегеҙгә төшөрәбеҙ: май башында Башҡортостан Башлығы Рөстәм Хәмитов Күмертауҙа инвесторҙар – йылдам социаль-иҡтисади үҫеш биләмәһенең буласаҡ резиденттары менән осраш­ҡайны. Төбәк етәксеһе билдәләүенсә, инвестиция сәйәсәте эшмәкәрлектең өҫтөнлөклө йүнәлеше булып тора. 2016 йыл йомғаҡтарына ярашлы, Башҡорт­остан инвестиция эшмәкәрлеген үҫтереү тиҙлеге буйынса Волга буйы федераль округында беренсе урынды биләне. Илдә булдырылған ун йылдам социаль-иҡтисади үҫеш биләмәһенән бер юлы икәүһе – Күмертау һәм Бәләбәй – республикала урынлашҡан.
“Бөтә хөкүмәт менән йылдам үҫеш биләмәһе буйынса Күмертау һәм Бәлә­бәй проекттары мәғәнә һәм эш йәһәтенән тулыланһын өсөн тырышабыҙ, — тине Башҡортостан Башлығы. — Күмертауҙа һәм Бәләбәйҙә бөтә шарттар булдырыу һәм йылдам үҫеш биләмәләрен ойоштороу өҫтөндә шәхсән рәүештә үҙем эшләйәсәкмен”.