Район хужалыҡтарының бер ҡасан да эшһеҙ торғаны юҡ: яҙғы сәсеү тамамланыу менән техника ремонтлана, ҡышты иҫән-һау үткәргәс, йәнә ең һыҙғанып баҫыуға сығалар. Вәлиев исемендәге тоҡомсолоҡ заводына беҙ барғанда эштәр гөрләй ине – хужалыҡ яҙғы сәсеүгә әҙерләнә, ашламалар барлай.
– Ауыл уңғандарҙы ярата. Бөгөн тир түкмәйенсә йәшәп булмай, – тип ҡаршы алды хужалыҡ рәйесе Ғәли Мир­ҡасимов. – Яҙғы сәсеүгә әҙер­лә­нәбеҙ. Ашламалар индерәбеҙ. 450 тонна карбамид алдыҡ. Хужалыҡҡа килгәндә инде, 2500 һыйыр малы бар, шуның 800-ө һауыла, йәнә 300 баш йөк аты аҫрала. Беҙҙең хужа­лыҡҡа ҡара-сыбар мал үрсетеү буйынса тоҡомсолоҡ заводы статусы би­релде. Матди-техник базабыҙ ҡеүәтле: заманса техника 300 берә­мектән ашыу һәм техника паркы йыл һайын яңыртыла бара. Мал һимертеү майҙансығы эшләй, әммә юғары нәтижәләргә өлгәшеү өсөн мал аҙығының сифатлы булыуы шарт.
Вәлиев исемендәге тоҡомсолоҡ заводы, “500 ферма” республика программаһында ҡатнашып, биш бина төҙөй. “Ауыл өйө” программаһы буйынса йәш белгестәр күркәм йорттар һалып ингән.
Хужалыҡта малсылыҡты үҫтереү айырым программаға ярашлы ойошторола. Унда 200-ҙән ашыу кеше эшләй. Мал аҫрауы еңелдән түгел, әлбиттә. Быны һәр кем яҡшы белә. Ул түҙемлек, иғтибар талап итә. Был йәһәттән хужалыҡ эшселәре Мәсғүт Ханнанов, Илдус Нуруллин – тәжри­бәле мал ҡараусылар. Һауын­сылар Рафия Сәмиғуллина, Әлфиә Рәхи­мова, Ләйлә Шамилева, Светлана Ахунова, Рузана Әкрәмова үҙ эштәренән ҡәнәғәт. Әйткәндәй, был хәҙерге заман фермаһында һөткә һауынсының ҡулы ла теймәй. Барыһын да робот башҡара. Продукция туранан-тура үткәргес аша һыуытҡысҡа оҙатыла. Көнөнә ун тонна “аҡ” Дүртөйлө һөт комбинатына тапшырыла. Хужалыҡ һөт етештереүҙән мул табыш ала.
Механизаторҙар Рәил Аҫылов, Рифҡәт Әсәҙуллин, Рәмил Басиров, Ирек Хәкимов, Александр Чернышев, Илфаҡ Ғәзетдинов, Илшат Хәмәт­динов, Алмас Сәғәҙиев, Линар Сәғә­ҙиев, Әнәс Сәрүәров, Ришат Ситдиҡов, Ринат Хөсәйенов, Ришат Сәлим­гәрәев үҙ бурыстарын намыҫлы баш­ҡара. Ғәли Мирзаһит улы шулай уҡ урын­баҫарҙары Наил Солтанов, Владислав Фәрхетдинов, баш зоотехник Флүр Ғиндуллин, баш инженер Рим Михай­ловтың исемдәрен маҡтап телгә ала.
Йәмғиәттең өҫтөнлөклө йүнәлеше – малсылыҡ һәм үҫемлекселек. Һө­рөн­тө ерҙәре тиҫтәләрсә мең гектар майҙанды биләй. Хужалыҡ эшмә­кәрлегенең өҫтөнлөклө йүнәлеш­тәренең береһе – орлоҡсолоҡ. Бында элиталы сортлы бойҙай, арпа, һоло етештерелә. Етәкселек йылдан-йыл һыйыр малын арттырыуҙы үҙенә маҡсат иткән.
Вәлиев исемендәге тоҡомсолоҡ заводы етәксеһе Ғәли Мирҡасимов әйтеүенсә, малсылыҡ һәм үҫемлексе­лек тармаҡтарын алдынғы технологиялар нигеҙендә үҫтереү эше артабан да дауам итәсәк. Быларҙың ба­рыһы ла хужалыҡтың хәленән килер­ҙәй эштәр, сөнки райондың алдынғы хужалыҡтарының бер ҡасан да үҙ позицияларынан тайпылғаны юҡ.