Беҙҙең республикала эшләгәндәрҙең өстән бер өлөшө үҙенең хеҙмәттәштәре менән айына уртаса бер тапҡыр ыҙғыша икән. Ә хеҙмәткәрҙәрҙең 23 проценты эш урынында бер ҡасан да мөнәсәбәт асыҡламауы тураһында әйткән.
Ошо һорау алыу мәғлүмәттә­рен әҙерләгән “HeadHunter” агентлығы ышандырыуынса, анкетаға яуап биргәндәрҙең өс проценты хеҙмәттәштәре менән ни өсөндөр көн һайын нимәне­лер асыҡлай.
Ҡайҙа ыҙғыш күберәк? Әлеге агентлыҡ конфликттарҙың күбе­һе торлаҡ-коммуналь хужалыҡта булыуын билдәләй, барлыҡ әрләш-талаштың 15 проценты ошо тармаҡҡа тура килә икән. Ҡаҙылма байлыҡ сығарыусылар һәм ҡунаҡхана-ресторан кеүек хеҙмәтләндереү урындарында эшләгәндәр ҙә унан ҡалышмай: тәүгеһендә был күрһәткес – 13 процентҡа, икенсеһендә 12 процентҡа тиң.
Сәнғәт һәм мәҙәниәт учреждениеларында, финанс өлкәһен­дә, телекоммуникация фирмаларында ыҙғыш осраҡтары баш­ҡа­ларҙан кәмерәк. Яуап биргән­дәрҙең 77 проценты конфликт өсөн төп сәбәп тип эш буйынса килеп сыҡҡан мәсьәләләрҙе, 10 проценты көнкүреш уңайһыҙ­лыҡ­тарын атаған. Вағыраҡ сәбәптәр араһында шәхси мөнә­сәбәттәр, хеҙмәттәштәренең наҙанлығы һәм “әхлаҡ кимә­ленең төшөүе” телгә алынған.