Былтырғы йыл ауыл хужалығы эшсәндәре өсөн уңдырышлы булды. Иген үҫтереү, етештереү буйынса һөҙөмтәләр ҡыуаныслы. Баҡтиһәң, бал ҡорттары ла “тырышып эшләгән”.
Рәсәйҙә барлығы 75 мең тонна бал йыйылған. Был – яҡшы һө­ҙөм­тә. Мәҫәлән, 2011 йылда 60 мең тонна булһа, 2013 йылда 68 мең тоннаға еткән. Һуңғы йылдар­ҙа Рәсәй балын экспортҡа оҙатыу буйынса күрһәткес арта. 2011 йылда сит илдәргә 88 тонна һатылһа, 2013 йылда был һан 500 тоннаға еткән. Былтыр иһә 3,6 мең тонна шифалы аҙыҡ экспортҡа йүнәл­телгән. Илдә ҡорт күсе лә ишәйә – уның һаны хәҙер ун меңдән артып киткән.
Әлбиттә, был 75 мең тонна – “Рос­стат”тың рәсми мәғлүмәте. Бүтән ойошма – Бөтә Рәсәй умартасылар берләшмәһе күберәкте, яҡынса йөҙ мең тонна, тип белде­рә. Әммә ике осраҡта ла уңыш бик һәйбәт. Хатта был юҫыҡта Совет осорондағы иң яҡшы һөҙөм­тәләрҙе лә уҙып киттек. Мәҫәлән, 1991 йылда 42 мең тонна бал етештерелгән.
Бөгөн Рәсәй донъяла бал алыу буйынса иң ҙур биш ил иҫәбенә инә. Беренсе урында – Ҡытай (350 мең тонна). Унан һуң АҠШ, Аргентина, Һиндостан, Төркиә. Улар йылына 80 – 110 мең тонна бал етештереп, бер-береһенең үксәһенә баҫып килә.