Башҡортостан һөт менән үҙен 130 процентҡа тәьмин итә – бер кешегә 445 килограмм һөт етештерелә.Былтыр республикала 1 миллион 812 мең тонна аҡ алынып, ул Рәсәйҙә алдынғы урынды биләне. Һөт аҙыҡтарының 80 проценты үҙебеҙҙә эшкәртелә. Предприятиеларға килгән 578 мең тонна һөттөң 10 проценты самаһы халыҡтан йыйыла, 150 мең тоннаһы күрше төбәктәрҙән килтерелә.
– Сит илдәр иғлан иткән санкциялар беҙҙең файҙаға булды, – ти ауыл хужалығы министрының беренсе урынбаҫары Азат Йыһаншин. – Һөҙөмтәлә тармаҡтың күп өлкәләрендә, шул иҫәптән сыр, аҡ май етештереү күләме артты.
Бөгөн магазин кәштәләрендәге продукцияның 80 проценты – республиканыҡы. Шул уҡ ваҡытта һөт һатып алыу хаҡы көнүҙәк мәсьәлә булып ҡала. Был юҫыҡта миҙгелгә ҡарап үҙгәргән хаҡты көйләү, етештереүҙең табышлылығын арттырыуға ярҙам итеү өсөн Рәсәйҙең Ауыл хужалығы министрлығы менән берлектә һөтсөлөк интервенцияһы буйынса эш алып барыла.
– Башҡортостан етештереүселәре быға әҙер, – ти Азат Йыһаншин. – Эшкәртеү ҡеүәте етерлек, барлыҡ санитар нормаларға һәм хәүефһеҙлек талаптарына яуап биргән келәттәр бар.
Әйткәндәй, республикала һөт аҙыҡтарын етештереүгә айырым иғтибар бирелә. Өфөлә һөт аҙыҡтарын ҡулланыу мәҙәниәтен тергеҙеү һәм үҙебеҙҙә етештерелгән сифатлы продукцияны пропагандалау маҡсатында 2011 йылдан “Һөт иле” байрамы ойошторола.