Бөтә Рәсәй ауыл хужалығы иҫәбен алыу сараһын йәнләндереү, уға барлыҡ быуын вәкилдәрен йәлеп итеү маҡсатында Дәүләт статистикаһы федераль хеҙмәтенең Башҡортостан буйынсатерриториаль органы республика балалары араһында инша һәм һүрәт конкурстары иғлан итте.
Тәүге бәйге “Ауыл хужалығы иҫәбен алыу балалар күҙлегенән” тип атала. Иншаларҙа ил иҡтисадының аграр тармағына тос өлөш индергән ауыл эшсәндәренең хеҙмәт ҡаҙаныштары сағылыш табырға, шулай уҡ сараның дәүләт кимәлендәге әһәмиәте билдәләнергә тейеш. Конкурста барлыҡ мәктәп уҡыусылары ҡатнаша ала. Башланғыс, урта һәм өлкән кластар өсөн айырым номинациялар ҡаралған. Еңеүселәрҙе дипломдар, иҫтәлекле бүләктәр көтә. Яҙмалар
4 июнгә тиклем ҡабул ителә.
Һүрәттәр конкурсында иһә 7 – 12 йәшлек уҡыусылар ҡатнаша. Сюжеттарҙа төрлө күренеште – иҫәп алыусы менән осрашыу, ҡағыҙ тултырыу мәле һ.б. – һынландырырға мөмкин. Шулай уҡ ауыл кешеһен, уның хеҙмәт һөҙөмтәләрен, йәнлек-ҡоштарҙы һүрәтләргә була. Конкурсҡа эштәр 31 майға тиклем ҡабул ителә. Премия фонды – 35 мең һум. Алты еңеүсе билдәләнәсәк.
Конкурстар хаҡында тулыраҡ мәғлүмәт менән “Бөтә Рәсәй ауыл хужалығы иҫәбен алыу-2016” сараһының матбуғат үҙәге сайтында танышырға мөмкин.