"Һуңғы йылдарҙа Дүртөйлө ҡалаһында эшҡыуарлыҡты, төрлө хеҙмәт күрһәтеү өлкәһендә бәләкәй бизнесты, күмәртәләп һәм ваҡлап һатыуҙы үҫтереүгә ҙур иғтибар бүленә. Ҡалала "Эльдорадо", "Пятерочка", "Полушка", "Монетка", “Терминал", "Добрый маркет" һәм башҡа ҙур сауҙа үҙәктәре үҙ ишеген асты. Тағы ла ике ҡатлы элекке универмаг биналары сауҙа комплексы итеп үҙгәртелде. Иванай ауылында ла ошондай уҡ комплекс сафҡа инде. Үҙәк урамдарҙа күп кенә ер шәхси магазиндарға, предприятиеларға һәм көнкүреш хеҙмәте күрһәтеү ойошмаларына бирелде. Бынан тыш, яңы сауҙа майҙандары барлыҡҡа килде, шулай уҡ элеккеләре заманса итеп яңыртылды. Беренсе Май, Совет, Вострецов, Седов урамдарында баҙар, сауҙа-сервис комплекстары, ҡаланың сәнәғәт зонаһында "Арктика" аҙыҡ-түлек, "Төҙөлөш ихатаһы" баҙары асылды. Бөгөн был объекттарҙа йөҙләгән кеше эш менән тәьмин ителгән.
Район хакимиәте эшҡыуарлыҡ өлкәһендәге яңы башланғыстарҙы һәр саҡ хуплай, яҡлай һәм һәр яҡлап ярҙам итә. "Урал-Трейдинг" йәмғиәтенең сауҙа нөктәләре лә уңышлы эшләй. Былтыр йәмғиәт үҙ аҡсаһына Горшков урамындағы баҙарға капиталь ремонт үткәреп, бөтә уңайлыҡтары булған заманса сауҙа рәттәре булдырҙы. Киләсәктә лә йәмғиәт яңыртыуҙы дауам итеп, был майҙанда ябыҡ типтағы сауҙа-сервис комплексы асыуҙы күҙ уңында тота. Дөйөм майҙаны – 7 мең квадрат метр тәшкил итәсәк".
Әммә эшҡыуарҙарҙан һәм һатып алыусыларҙан алынған мәғлүмәт икенсе төрлөрәк. Уларҙың бер нисәүһенең фекерен һеҙгә тәҡдим итәбеҙ.
Илмира ШАҒАПОВА, эшҡыуар: — Дүртөйлөлә сауҙа урындары аҙ түгел. Ләкин элек-электән халыҡ алыш-бирештең төп урыны — үҙәк баҙарға йөрөргә ғәҙәтләнгән, сөнки бында тауар һайлап алыу мөмкинлеге башҡа нөктәләргә ҡарағанда күпкә киң һәм хаҡтар “тешләшмәй”.
Өлгөрбай ағайҙың “Туҡһанынсы йылдарға рәхим итегеҙ!” тигән яҙмаһын кинәнеп уҡыныҡ, бөтәһе лә дөрөҫ. Баҙар етәкселегенә сауҙа урындарын заманса яңыртыу хаҡында күптән уйланырға ваҡыт, юғиһә егерме йыл инде ҡоро вәғәҙәләр менән ышандыралар. Илебеҙ күләмендә яңыртыу проекттары бойомға ашырылған заманда, баҙарҙың һаман да ошондай ҡыҙғаныс хәлдә ҡалыуы һис тә аңлашылмай. Йөктө урынынан ҡуҙғатыу өсөн урындағы хакимиәт һәм баҙар етәкселегенә аҡланырлыҡ сәбәптәр эҙләргә түгел, ә уны берҙәм һәм бер йүнәлештә тартырға кәрәк. Үкенескә ҡаршы, был хәрәкәт әлегә күренмәй. Быйыл да ошо шыҡһыҙ сауҙа урындарында ҡалырбыҙмы икән?
Камил КАМАЛЕТДИНОВ, эшҡыуар:
— Күрше Нефтекама, Яңауыл үҙәк баҙарҙарының төҙөклөгөнә хайран ҡалырлыҡ. Бында сауҙа өсөн уңайлы шарттар булдырылған. Беҙҙең Дүртөйлө ҡалаһы баҙары ғына меҫкен хәлдә — тишек-тошоҡ эш урындарында нисәмә йыл һатыу итергә мәжбүрбеҙ. Баҙар етәкселеге һис тә ыжламағас, һатыу итеү урынын таҡта менән ҡоршап ҡуйҙым, юғиһә йәйен тауарҙы ямғыр сылата, ҡышын буран үтә. Кешеләр батҡаҡҡа баҫмаһын тип йөрөү һуҡмағына баҫма яһаным. Сауҙа урынын һәр кем үҙенсә көпләй, шуға ла баҙарыбыҙ сыбар, сиған баҙарын хәтерләтә. Уның ҡасандыр әҙәм йөрөрлөк хәлгә әүерелеүенә өмөтөбөҙ күптән инде өҙөлгән. Ике тиҫтә йыл үҙгәрмәгәнде, киләсәктә үҙгәрер тиһегеҙме?
Беҙҙең Дүртөйлөлә әлегә тиклем асыҡ һауала сауҙа итергә мәжбүр эшҡыуарҙар, уңайһыҙ шарттарҙа хеҙмәтләндерелеүсе халыҡ хаҡында уйларҙармы икән?
Илшат МИҺРАНОВ, һатып алыусы:
— Ямғырлы көндәрҙә һатыусыларҙың утҡа баҫҡан бесәй кеүек ҡыланғандарын күреп, йәлләп ҡуям. Тауарҙарына һыу үтмәһен тип, полиэтилен менән ҡапларға, әйберҙәрен ҡумталарға тултырырға керешәләр. Ҡышҡы селләлә лә еңел түгел, йылынырға урын юҡ...
Ғөмүмән, беҙ ҡайһы заманда йәшәйбеҙ? Үҙәк баҙар, күркәмлеге менән балҡып, үҙенә саҡырып торорға тейеш. Ә беҙҙә... Ҡунаҡтар килһә, күрһәтергә лә ғәрләнәһең.
Лидия ЙЫҺАНШИНА, һатып алыусы:
— Шуға аптырайым: ҡалабыҙҙа эреле-ваҡлы сауҙа урындары, магазиндар йыл һайын ишәйә, ә олоһонан кесеһенә тиклем йөрөй торған баҙарҙы үҙгәртеп ҡороусы һаман юҡ. Ҡала етәкселегенә уны заманса итеү юлдарын эҙләргә, йә иһә һатып алып, муниципаль милеккә күсерергә кәрәктер. Йорт төҙөклөгө — хужанан, тиҙәр. Баҙарыбыҙ үҙенә күптән инде йүнсел етәксе талап итә.
Марат МОРАТОВ әҙерләне.
Дүртөйлө ҡалаһы.
Дүртөйлө ҡалаһы.
Редакциянан. Республикабыҙҙың башҡа ҡалаларындағы кеүек, Дүртөйлөлә лә халыҡ ихтыяжын ҡәнәғәтләндерерлек, заман талаптарына яуап бирерлек сауҙа үҙәктәре, магазиндарҙың булыуы хуплауға лайыҡ. Әммә, ҡыҙғанысҡа ҡаршы, хакимиәт башлығының гәзиткә яуап хатында дүртөйлөләрҙең төп алыш-биреш урыны — “Урал трейдинг” яуаплылығы сикләнгән йәмғиәтен, йәғни ҡалалағы иң ҙур үҙәк баҙарҙы, ташландыҡ хәлдән замансаға әүерелдереү юлдары хаҡында төплө, аныҡ фекер әйтелмәгән. Район етәксеһе ошо баҙар урынында 7 мең квадрат метр майҙанда заманса сауҙа-сервис комплексы булдырыласағы хаҡында һүҙ йөрөтә, ләкин төҙөләсәк сауҙа үҙәгенең раҫланған проекты бөгөнгәсә юҡ, баҙар оҙаҡ йылдар ҡыҙғаныс хәлдә ҡала килә. Шуныһы үкенесле: баҙар етәкселеге менән район хакимиәте араһында хеҙмәттәшлек юҡ. Шәхси предприятиелар эшенә ҡыҫылыу түгел, уларға кәрәк сағында ярҙам күрһәтеү зарур. Ә Дүртөйлө районы хакимиәте башлығының хатында быға ынтылыш һиҙелмәй. Тимәк, йөк һаман үҙ урынында.