Башҡортостан Хөкүмәте “Туймазытехуглерод” асыҡ акционерҙар йәмғиәтенә идара итеүҙә ҡатнашыу йәһәтенән махсус хоҡуҡтың (“алтын акцияның”) ғәмәлдән сығыуы тураһында ҡарар ҡабул итте.

Республика, йәмғиәттең акционе­ры булмаһа ла, 1993 йылда “Туймазытехуглерод” хосуси­лаштырылғандан алып уның “алтын акцияһы”на хужа. Махсус хоҡуҡ акционерҙарҙың дөйөм йыйылышында айырым мәсьәләләр буйынса ҡабул ителгән ҡарарҙарға “вето” һалыу мөмкинлеген бирә. Ә бының предприятиеның үҫешен сикләүгә килтереүе ихтимал.
— Хоҡуҡтан баш тартыу предприятие эшмәкәрлегенә инвестиция йәлеп итеү, төбәк ҡаҙнаһына һалым керемен, табышты арттырыу, яңы эш урындары булдырыу йәһәтенән ыңғай һөҙөмтә бирергә тейеш, — тине республиканың ер һәм мөлкәт мөнәсәбәттәре министры Евгений Гурьев.