“Ҡандра икмәк комбинаты” ҡулланыусылар йәмғиәтенең тарихы йыраҡ 1966 йылға барып тоташа. Төрлө осорҙарҙы кисерергә тура килә уға, әммә заман елдәренә бирешмәй. Улай ғына ла түгел, Ҡандра икмәгенең даны йылдан-йыл үҫә. Был — предприятиела эшләп, изге эш башҡарған бер нисә быуын һөнәр оҫталарының намыҫлы, тырыш хеҙмәт емеше. Бөгөн комбинат биш икмәкхананы берләштерә. Уларҙың икеһе – Ҡандрала, ҡалғандары Ҡарамалы-Ғөбәй, Дуҫлыҡ һәм Түбәнге Троицк ауылдарында урынлашҡан. Йәнә ике кондитер цехы эшләй. Комбинат тәүлегенә ете тонна икмәк-ҡалас һәм 180 килограмм тәм-том етештерә. Предприятие етештереү күләме буйынса “Башпотребсоюз” тармағында икенсе урында тора. Эш күләмдә генә түгел. Иң мөһиме — икмәктәренең сифаты юғары, сөнки уны халҡыбыҙҙың икмәк бешереүҙәге күркәм йолаларына нигеҙләнеп, ҡомалаҡ әсеткеһендә генә бешерәләр. Технологиялар заманы булһа ла, ҡамырҙы формаларға автомат бүлмәй, сөнки ҡамыр ҡул йылыһын тойғанда ғына күпереп ҡабара, тәмле була, тиҙәр. Ысынлап та, Ҡандра икмәге хуш еҫле, ҡабарып бешә, ҡомалаҡ ҡулланғас, оҙаҡ һаҡлана.
Көн һайын иртә менән яңы бешкән икмәкте тиҫтәгә яҡын махсус машина Өфө, Туймазы, Октябрьский ҡалаларына, күрше Татарстанға алып китә. Сауҙа предприятиелары менән килешеүҙәр төҙөлгән. Икмәкте комбинаттың Ҡандра ауылындағы ике мага- зинында һәм башҡа сауҙа нөктәләрендә, ауыл магазиндарында һаталар.
Предприятие халыҡта ҙур ихтыяж менән файҙаланған икмәк-булканың 100 төрөн бешереү мөмкинлегенә эйә. Тәм-томдоң да ассортименты бай. Сәксәк, бәлештәрҙе шәхси заказдар буйынса ла әҙерләйҙәр. Етештереү күләмен арттырыу, яңы технологиялар индереү, хеҙмәт шарттарын тағы ла яҡшыртыу маҡсатында һуңғы йылдарҙа етештереү биналары реконструкцияланған, йыһаздар яңыртылған. Әйтәйек, Ҡандралағы икмәк цехтарының икеһе лә үткән быуаттың 60-сы йылдарында төҙөлгән. Һуңғы өс-дүрт йылда уларҙы яңыртыуға ҙур сығым тотонолған. Әле Түбәнге Троицкиҙа төҙөкләндереү эштәре теүәлләнгән. Уларҙы предприятие үҙ иҫәбенә башҡарған. Йәнә кондитер цехында заманса йыһаздар урынлаштырып, етештереүсәнлекте тағы ла ҡеүәтлерәк итергә ниәтләйҙәр. Ҡандралағы 1-се икмәкханала бер юлы 400 дана икмәк бешереү мөмкинлеге биргән яңы мейес урынлаштырғандар. Һуңғы бер нисә йылда предприятиеның автопаркы ла тулыһынса яңыртылған.
Яңы техника, технологиялар заманы булһа ла, ойошманы алтын ҡуллы һөнәр оҫталары данлай. Бында бөгөн йөҙгә яҡын кеше эшләй. Хеҙмәткәрҙәрҙе һайлап ҡына алалар. Һәләтле йәштәрҙе ойошма өлөшләтә үҙ иҫәбенә уҡыта. Әле алты кеше – Рәсәй кооперация университетының Башҡортостан кооператив институтында һәм техникумдарҙа, күптәр ваҡыт-ваҡыт “Башпотребсоюз” ҡарамағындағы белемде камиллаштырыу курсында уҡый. Хеҙмәт кешеһе тураһында хәстәрлек ҙур бында. Алдынғыларҙы ял йорттарына ебәрәләр. Тотороҡло хеҙмәт хаҡы алғас, һәр кем күңел биреп эшләй.
Предприятие эшсәндәре, әленән-әле конкурстарҙа, һөнәри бәйгеләрҙә ҡатнашып, үҙҙәрен таныта. Мәҫәлән, Кулинария һәм сервис буйынса республика чемпионатында III урынды яулағандар. Уларҙың уңыштары “Башпотребсоюз” һәм “Центросоюз”дың күп Почет грамоталары, дипломдар менән бүләкләнгән. Ойошма бешергән I сортлы бойҙай икмәге “Башҡортостан продукты” тигән абруйлы исемгә лайыҡ булған. Предприятиеның тауары йәрминкә һәм күргәҙмәләрҙә лә маҡтаулы урын яулай.
Әлбиттә, коллективтың уңыштары етәксенең тырышлығына, ойоштороу һәләтенә бәйле. Предприятиеға һуңғы егерме йылда Башҡортостандың аҙыҡ индустрияһы буйынса атҡаҙанған хеҙмәткәре Рәлиә Исхаҡова етәкселек итә. Әлеге ойошмаға ул техникум тамамлағандан һуң юллама буйынса эшкә килә. Тәүҙә лаборант-технолог, унан производство мөдире булып эшләй. Рәлиә Әғзәм ҡыҙы ойошманы әлеге тармаҡта алдынғы итеү өсөн ҙур көс һала. “Ҡандра икмәк комбинаты” ҡулланыусылар йәмғиәте – “Башпотребсоюз”да финанс тотороҡлолоғо буйынса тәүге өс предприятие иҫәбендә. Был уңайҙан оҙаҡ йылдар намыҫлы хеҙмәт иткән баш хисапсы Ғәлимә Яҡупова, уның хеҙмәттәштәре Эльмира Сәйфетдинова менән Роза Хәлиуллинаның тырышлығын билдәләп үтеү кәрәк.Бөгөнгө ауыр иҡтисади шарттарҙа ла йылдың тәүге яртыһында етештереү күләме 101,5 процентҡа артҡан. Табыш алыу буйынса ла үҫеш шаҡтай юғары.