Крәҫтиән (фермер) хужалыҡтарын үҫтереү, фермерҙарға ярҙам итеү, уларҙың тын алышын һәм теләген белеү маҡсатында район үҙәге Федоровка ауылында семинар-кәңәшмә ойошторолдо.Район мәҙәниәт йортоноң фойеһын танырлыҡ түгел – ауыл хужалығы тауарҙары күргәҙмәһе уны күркәм иткән. Фермер Булат Насиров етештергән тауарҙарҙы халыҡ кинәнеп ҡараны, “Башгусь” йәмғиәте өсөн тиҙҙән ҡыҙыу осор башланасаҡ – белгестәр был турала һөйләне, “Регион-сервис” йәмғиәте һөт ризыҡтарын тәмләтте, шулай уҡ башҡаларҙың эргәһенән дә кеше өҙөлмәне. Үҙен Вадим тип таныштырған егет, диплом алғас, шәхси эшҡыуарлыҡҡа тотонмаҡсы, бында тәжрибә тупларға, эшкә өйрәнергә килгән.
Башҡортостандың ауыл хужалығы министры урынбаҫары Раил Афзалов белдереүенсә, республикабыҙҙа фермерҙар өсөн һәр яҡлап уңайлы шарттар тыуҙырылған, субсидия юлларға мөмкин, ташламалы кредит бирелә, бүтән төрлө өҫтөнлөктәр менән дә файҙаланалар.Федоровка районы хакимиәте башлығы урынбаҫары Нурфәйез Насретдинов төбәктең социаль-иҡтисади хәленә байҡау яһаны.
– Ауыл хужалығының төп тармаҡтары – игенселек, һөтсөлөк, малсылыҡ, йылҡысылыҡ, сусҡасылыҡ, ҡош-ҡорт үрсетеү, умартасылыҡ, көнбағыш һәм шәкәр сөгөлдөрө үҫтереү, – тип башланы һүҙен Нурфәйез Ғәлимулла улы. – 150-нән ашыу предприятие, шул иҫәптән биш ауыл хужалығы продукцияһы етештереү кооперативы, яуаплылығы сикләнгән 13 йәмғиәт, 143 крәҫтиән (фермер) хужалығы һәм 7130 шәхси хужалыҡ тауар етештерә. Беҙҙә шәхси хужалыҡтарға һәм фермерҙарға маҡсатлы программалар ҡаралған, улар төрлө субсидия һәм дотация ала. Былтыр ярҙамдың 19 төрө бирелде, дөйөм сумма 100 миллион һум тәшкил итте.
Фермерҙарҙың иҡтисадҡа йоғонтоһо ҙур. Әйтәйек, райондың дөйөм ауыл хужалығы ерҙәренең 16 мең гектары крәҫтиән (фермер) хужалыҡтарына тура килә, был 16 процент тәшкил итә.
Райондың тотороҡло үҫеше, һис һүҙһеҙ, ауыл хужалығы менән бәйле. Мәҫәлән, игенселектә “Азат”, “Нива”, “Маяҡ”, “Агросервис”, “Гавриловка” йәмғиәттәре, Фрунзе исемендәге, “Заветы Ильича” ауыл хужалығы етештереү кооперативтары алдынғылыҡты бирмәй. Башҡортостандың Ауыл хужалығы тауарын етештереүселәр союзы рәйесе Зифҡәт Сәйетғәлиев фермерҙарға һәр йәһәттән дә ярҙам буласағына ышандырҙы.