Бешкәк ҡалаһында Башҡортостан Башлығы Рөстәм Хәмитов Ҡырғыҙстан Премьер-министры Джоомарт Оторбаев менән осрашты.
Сарала шулай уҡ сауҙа-иҡтисади, фәнни-техник һәм гуманитар хеҙмәттәшлек буйынса Ҡырғыҙстан — Рәсәй хөкүмәт-ара комис­сияһы рәйестәше Андрей Бельянинов, республиканың рәсми делегацияһы ағзалары ҡатнашты. Улар, хәбәр итеүебеҙсә, Беш­кәккә Ҡырғыҙстанда барған Башҡортостан фәне һәм мәҙәниәте көндәренә барғайны. Осрашыу барышында ике яҡ иҡтисади, фәнни һәм мәҙәни йәһәттән үҙ-ара хеҙмәттәшлек мәсьәләләрен тикшерҙе.
Рөстәм Хәмитов әйтеүенсә, Ҡырғыҙстан менән Башҡортостан араһында бәйләнеш нығый.
– Аграр өлкәлә берлектә эш алып барыу, Ҡырғыҙстандан Башҡортостанға продукция сығарыу хаҡында һүҙ алып барабыҙ, — тине Рөстәм Хәмитов. — Бер үк ваҡытта химия, нефть химияһы тармағында мөнәсәбәттәрҙе яйға һалырға, берлектә предприятиелар асырға, продукцияны тәрән эшкәртергә кәрәк. Өр-яңы ҡыҙыҡлы проекттар байтаҡ. Уларҙы тормошҡа ашырыу өсөн, әлбиттә, ваҡыт талап ителә.