Башҡортостан Хөкүмәте республика парламентына һалым тураһындағы айырым закон акттарына төҙәтмәләр тәҡдим итте.

Яңы проектҡа ярашлы, киләһе йылдың 1 ғинуарынан инвесторҙарға дәүләт ярҙамының өҫтәмә сараларын билдәләү күҙаллана. Ундайҙарға капитал һалыуға талапты кәметеү, табышҡа һалым буйынса түбәнәйтелгән ставка ҡулланыу, ойошмалар мөлкәтенә һалым түләүҙән бушатыу инә.
Хөкүмәт Премьер-министры урынбаҫары Илшат Тажетдинов әйтеүенсә, ҡануниәттәге был яңылыҡ республиканың көньяҡ-көнсығыш һәм төньяҡ-көнсығыш райондарын иҡтисади йәһәттән үҫтереүҙең урта ваҡытлы программаларын тормошҡа ашырыуға йүнәлтелә. Яңы закон проекты инвестиция йәлеп итеү ҡеүәһен, мәшғүллекте һәм урындағы халыҡтың килемен арттырыу, өҫтәмә эш урындары булдырыу мөмкинлеген бирәсәк.