Бер нисә йыл рәттән ҡабатланған аяуһыҙ ҡоролоҡ республиканың көньяҡ-көнсығыш төбәге аграрийҙарына ҡаты һынау ҡуйғайны. Был афәттән Баймаҡ районы хужалыҡтары ла ныҡ зыян күрҙе. Быйылғы яҙҙың яҡшы килеүе, әлбиттә, игенселә өмөт уята, һәйбәт уңышҡа ишаралай. Республиканан орлоҡ һатып алыу өсөн район аграрийҙарына бөтәһе 20 миллион һум ярҙам бүленгән, сәселгән һәр гектар ер өсөн бирелгән субсидия ла яғыулыҡ алырға ярап ҡала.

Башҡортостандың атҡаҙанған ауыл хужалығы хеҙмәткәре Ғәлим Булат улы Сәлимов етәкләгән Ленин исемендәге хужалыҡ төбәктә генә түгел, республикала ла танылыу алған. Йәмғиәт баҫыу эштәрен дә иң тәүгеләрҙән булып тамамлаған. Төбәктең тәжрибә үҙәге булараҡ ул эшмәкәрлеген алдынғы технологиялар нигеҙендә алып бара, йылдан-йыл ҡеүәтен арттыра, техникаһын нығыта. Быйыл хужалыҡтың ауыл эшсәндәре 2500 гектарҙа иген, 1 660 гектарҙа мал аҙығы культуралары сәскән. Көҙгө уңышҡа ныҡлы нигеҙ һалыуҙа һәр игенсе ысын хеҙмәт ҡаһарманлығы күрһәткән. Тырматыуҙа Хадарис Мортазин, Альберт Шаһморатов, Альберт Гөлбәйетов, сәсеүҙә Башҡортостандың атҡаҙанған ауыл хужалығы хеҙмәткәрҙәре Айрат Бүкәнбаев менән Наил Солтанов, шулай уҡ Айрат Туйсин, Ғәйзулла Һағынбаев, Фәнил Ғәйетбаев баҫыу батырҙары булып танылған. Водителдәр Юнир Байегетов, Шәфҡәт Ғайсин, Таһир Моталлаповтар ҙа — алдынғылар рәтендә.
Кооперативта хеҙмәтсәндәрҙе дәртләндереү саралары киң ҡулланыла. Яҙғы баҫыу эштәрен дәррәү атҡарып сығыу маҡсатында быйыл да удар өс көнлөк ойошторолоп, алдан ҡабул ителгән шарттарға ярашлы, унда еңеүселәр аҡсалата премия менән бүләкләнгән.
– Йыл да ҡабатланған ҡоролоҡ бөгөн хужалыҡ игенселәрен яҙғы баҫыу эштәрен ҡыҫҡа ваҡытта атҡарып сығырға мәжбүр итә, шуға ла һәр кем тырышып эшләне. Алла бойорһа, мул уңыш үҫтереп алырбыҙ тигән өмөт-ышаныс бар, – ти хужалыҡ рәйесе Ғәлим Сәлимов.