“Благовар тоҡомсолоҡ заводы” предприятиеһының оло юлдан байтаҡ ситтә ятҡан баҫыуына килеп еткәндә ҡеүәтле сит ил техникаһы ҡапма-ҡаршы яҡта ине. “Дөрөҫөрәк боролмағанбыҙ, былай булғас, байтаҡ ҡына көтөргә тура килер инде”, — тигәнерәк уйымды, күрәһең, ҡарашымдан һиҙҙе хужалыҡтың баш агрономы Вадим Балашов.
— Был яҡҡа ыңғайланы, “һә” тигәнсә килеп етәсәк ул, — тип тынысландырырға ашыҡты.

Баш инженер Тимур Ғарифуллин был техниканың өҫтөнлөгө хаҡында һөйләп, юҡҡа ғәжәпләндермәгән булып сыҡты. Һөргән, сәскән, тырматҡан һәм тағы ла әллә күпме төр эште бер юлы атҡарған “Джон Дир” тракторынан бер генә механизатор килеп төштө. Баҡһаң, Ринат Мөҡминов уға яңғыҙы идара итә. 230 гектар майҙанда нут сәскән сағы икән. Бер үткәндә 11 метр киңлектәге майҙанда башҡарыла үрҙә һанап үтелгән эштәр. Ғөмүмән, көнөнә 100 гектарға тиклем ерҙә сәсә ала. Ике бункерына алты тонна орлоҡ һыя, һәм уны тейәү өсөн ни бары 15 минут ваҡыт кәрәк.
Был ялан карабында 1600 гектар майҙанды иңләгәндәр ҙә инде. “Бер ҡарағанда, баҫыуға инеп барһа, икенсе ҡараһаң, эште теүәлләгән була. Механизаторҙар үҙенсәлекле техниканы һәйбәт үҙләштерҙе. Хаҡы ҡиммәт, әлбиттә, 16 миллион һум, әммә үҙен аҡлаясаҡ”, — тиҙәр.
Ҡорал эшләй, ир маҡтана, тиһәләр ҙә, механизаторҙар иңендә — сәсеүҙе сифатлы һәм ваҡытында тамамлау бурысы. Кистән яуып үткән ямғыр апаруҡ ҡына төшкән, күрәһең: ҡайһы бер урындар ныҡлап елләп тә өлгөрмәгәйне. Шулай ҙа игенселәр, күнегелгәнсә, таң һарыһынан баҫыуға килгән. Яҙғы көндөң йылды туйҙырыр мәле бит. Дым булғанда ҡара ергә орлоҡ төшөрөп ҡалырға тырышалар. Хәҙер “минән киткәнсе, эйәһенә еткәнсе” тип эшләү юҡ. Благовар игенселәренең берҙәм булыуы шунда уҡ тойолдо.
Ринат Мөҡминовты “КамАЗ” автомобилендә орлоҡ ташыусы Николай Гехт та көтә ине. Йөҙө май ҡояшы кеүек балҡып торған алсаҡ шоферҙың да ер кешеһе икәнлеге булмышынан уҡ күренеп тора. Ошонда 20 йылдан ашыу эшләп, бай тәжрибә туплаған, һәм төп көстәрҙең береһе ул.
— Хужалыҡта сәсеү бөгөн-иртәгә тамамланырға тора. Ҡуҙаҡлы культураларҙы 3100 гектарҙа сәстек. Ужымды туҡландырыуҙы тамамланыҡ. Яҙ һуңлабыраҡ килде, көндәрҙең ямғырлы тороуы ла эште бер аҙ тотҡарланы, шуға ла сәсеүҙе ике сменала ойошторҙоҡ. Ерҙә дым етерлек, ашлама тупланғайны, орлоҡто яңырттыҡ. Ҡыҫҡаһы, әҙерлек яҡшы ине. Игенсе һәр ваҡыт ҡара ергә орлоҡто өмөт менән һала. Беҙ ҙә быйыл уңыштың һәйбәт булырына ышанабыҙ, — тине Вадим Балашов.
Кәйефтәре шәп егеттәрҙең. Яғыулыҡҡа субсидия алғандар, сәсеү эштәре өсөн дә аҡса килеп етергә тейеш. Ҡар ҡалын булғас, ужым, нигеҙҙә, һәйбәт ҡышлаған. Ни бары 30 гектар майҙанда яңынан сәсергә тура килгән.
Баш агроном өс бүлексәлә лә механизаторҙарҙың яҡшы эшләүен билдәләне, береһен телгә алып, икенсеһенең күңелен төшөрөү килешмәҫ тип, байтағының исем-шәрифен атаны. Лайыҡтар икән, ниңә күрһәтмәҫкә?! Уҙыбаш бүлексәһенән — Рузил Камилйәнов менән Илдус Әхтәмов, Ҡашҡалашанан — Андрей Бойков, Захим Вәлмөхәмәтов, сәсеүсе Радмир Ғәтиәтуллин, Владимир Антонов, Айрат Мөҡминов, Топоринка бүлексәһенән Ришат Батыргәрәев һәм Олег Алексеев иңендә — “Благовар тоҡомсолоҡ заводы” предприятиеһының игенселек тармағы яҙмышы.
Районда сәсеүҙең көйлө алып барылыуы хакимиәт башлығының ауыл хужалығы буйынса урынбаҫары Камил Мөхәмәтйәнов менән осрашып һөйләшкәндә үк төҫмөрләнгәйне. Быға әле күргәндәр ҙә ышандырҙы.
Баҫыу иңләгән техника һәм ир-ат менән танышып-һөйләшкән арала иртәнге аш килтерҙеләр. Көнөнә дүрт тапҡыр ашаталар уларҙы. Ҡояш нурына ҡойонған баҫыу ҡырында, эргәләге ағастарҙа ҡош һайрауын тыңлап, тамаҡ ялғап ҡалды механизаторҙар.