“Шайморатов” яуаплылығы сикләнгән йәмғиәте эшсәндәре һәм ауыл халҡы, боронғо ғөрөф-ғәҙәттәргә тоғро ҡалып, матур йолаларҙың береһе булған Бураҙна байрамын гөрләтеп үткәрҙе һәм дәррәү сәсеүгә төштө.

Иген сәсә башлауға ҙур әһәмиәт биреү киләсәккә өмөт, беҙҙе туйындырыусы Ер-әсәгә мөхәббәт, ауыл эшсәндәренең хеҙмәтенә тоғролоҡ менән бәйле. Ысынлап та, Бураҙна байрамы — оҫта ойоштороусы хужаға, тырыш халыҡҡа, иген үҫтереүсегә мәҙхиә йырлаусы тантана ул.
Күркәм сара “Ғәлимйән һәм Ғәтиә” мәсетендә мосолмандарҙың йыйылыуы һәм ауылдың имам-хатибы Әфҡәт Ниғмәтуллиндың вәғәз уҡыуы менән башланды. Шулай булмай ни, бындай оло эште башлар алдынан Аллаһ Тәғәләнең фатихаһын алыу зарур. Халыҡ доға ҡылғас, яланға ашыҡты. Унда барыуға усаҡта быуланып тәмле былау бешә, ә баҫыуҙа “тимер ат”тар, ярышҡа сығырға әҙерләнгәндәй, геүләп тора ине.
— Шатлыҡлы көндәрҙең береһе был: беренсе нәүбәттә сәсеүгә төшһәк, икенсенән, ата-бабабыҙҙан ҡалған ғөрөф-ғәҙәтте тергеҙеү – бик сауаплы эш. Көндәр яҡшы тороп, имен-аман сәсеүҙе башлап ебәрергә Хоҙай насип итһен, – тине йәмғиәттең башҡарма директоры Илгиз Йосопов, ауыл халҡын, хужалыҡ эшсәндәрен тәбрикләп.
— Уҙған йылдарҙағы ҡоролоҡ беҙҙең алға ҙур һынауҙар ҡуйҙы. Һөҙөмтә юғары булмаһа ла, ауырлыҡтарҙы йырып сыҡтыҡ. Быйыл иһә, хөрмәтле дуҫтар, быуындан быуынға күсә килгән йола буйынса, бергәләшеп изге теләктәр теләйек. Имам-хатиптан фатиха алдыҡ, байрамға ихласлыҡ менән йыйылдыҡ. Былар бөтәһе лә тик файҙаға ғыналыр, тип ышанам. Аллаһ бойорһа, уңыштарыбыҙ мул булыр әле, — тип һөйләне үҙ сығышында ауыл биләмәһе башлығы Илвир Моратшин.
Артабан баҫыу алдынғыларын – механизаторҙар Рифғәт Ишмөхәмәтов менән Петр Гарчевты — ололап, мул уңыш теләп, икмәк һәм тоҙҙан ауыҙ иттерҙеләр, һуңынан ғүмер буйы хужалыҡ йөгөн тартҡан уҙамандар тәүге бураҙнаға орлоҡ һалырға төштө. Улар артынса барса халыҡ, шифалы ямғырҙар яуһын, йылдар тыныс, сәсеүҙәр уң булһын, тип теләп, баҫыу буйлап бешкән йомортҡа тәгәрәтте. Тракторҙар геүләшеп тәүге һабанға төштө.
Шайморатов ауылы халҡы бик дәртле икән — гармунда, ҡурайҙа уйнап, бейеп-йырлап күңел асты. Яланда бешкән былауҙың тәме телде йоторлоҡ ине, сәйҙәре хуш еҫ бөркөп торҙо. Ҡыҫҡаһы, Бураҙна байрамы шаулап үтте. Барыһы ла күтәренке кәйефтә таралышты.