Бөгөн ауыл кешеһе өсөн иң мөһиме – шөғөл булһын һәм хеҙмәт хаҡы түләүҙә тотҡарлыҡтар күҙәтелмәһен. “НЕРАЛ-Шишмә” ауыл хужалығы етештереү предприятиеһы” яуаплылығы сикләнгән йәмғиәтендә иһә был тәңгәлдә барыһы ла яҡшы: Ураҙбахты, Алкин, Сәлих һәм Санжаровка ауылдары халҡы эш урыны булыуына шат, аҡсаһын да ваҡытында ала.

– Ғәҙәттәгесә, оҙон ҡыш буйы техниканы ремонтланыҡ, запас частар хәстәрләнек, – ти хужалыҡ етәксеһе Илшат Ғабдрахманов. – Хәҙер трактор һәм машиналарҙың һәр береһе төҙөк икән, был — хеҙмәткәрҙәрҙең тырышлығы һөҙөмтәһе. Яҙ башланыу менән бөтә көстө ашлама ташыуға йүнәлттек. Ошо көндәрҙә дым ҡапланыҡ, ашлама тараттыҡ, ужымды өҫтәмә туҡландырҙыҡ. Бер һүҙ менән әйткәндә, сәсеүҙе дәррәү башланыҡ.
Йәмғиәт Салауат исемендәге хужалыҡ нигеҙендә төҙөлгән. Уның ҡарамағында – биш мең ярымдан ашыу гектар һөрөнтө ер. Былтыр бер мең тирәһе гектар майҙанға ужым бойҙайы сәсеп ҡалдырған булғандар, ул бик матур ҡышлаған. Тағы ла бойҙай, арпа, нут, көнбағыш сәсәсәктәр. Әйткәндәй, “НЕРАЛ-Шишмә” орлоҡсолоҡ йүнәлешендә лә һынатмай. Башҡа хужалыҡтар унан орлоҡ һатып ала.
– Һәр хужалыҡ яңылыҡҡа ынтылған кеүек, беҙ ҙә төрлө алымдар ҡулланыу яғында. Әйтәйек, “no-till” технологияһына күсеү – замана талабы, – тип өҫтәй директор. – Минеңсә, туранан-тура сәсеүгә күсеү үҙен ысын мәғәнәһендә аҡлаясаҡ. Ерҙе йыл һайын аҡтарып ташлауҙан бер ниндәй ҙә фәтүә күрмәйем. Автопаркты яңыртыу – өҫтөнлөклө йүнәлештәрҙең береһе. “Джон Дир” маркалы ике трактор, “Турба-7” тигән бер сәсеү агрегаты, “МатерМакс” исемле сәскес һатып алыуыбыҙ – шуға асыҡ миҫал.
Киләсәктә табыш килтерә торған һәм баҙарҙа ихтыяж тыуҙырған культураларҙы күпләп үҫтереүгә баҫым яһаласаҡ.
Үҫемлекселектән айырмалы, малсылыҡта ла уңыштар байтаҡ. Шотландиянан алынған абердин-ангус тоҡомло меңдән ашыу һыйыр малы бар бында. Баҙарға әҙер продукция менән сығыу – өлгөрөп еткән мәсьәлә. Юғиһә итте арзан хаҡҡа бирергә тура килә. Үҙҙәрендә мал һуйыу цехы төҙөйәсәктәр.
Һәр шишмәнең үҙ йыры булған шикелле, хужалыҡтағы һәр хеҙмәткәр – үҙ эшенең оҫтаһы. Даими эшләүселәр – 30 кеше, йәйен хеҙмәткәрҙәр һаны 70-кә етә. Баш зоотехник Юля Лотфуллина, йәш белгес булараҡ эш башлағас, дәүләт программаһы буйынса Шишмә ҡасабаһынан фатир алған. Баш инженер Фидан Насретдинов, механизаторҙар Шамил Кәримов, Алексей Лазур, шулай уҡ механик Рәлиф Әхмәҙиев, Филғәт Усеев, Сажиҙә менән Альбина Шафиҡовалар – барыһына ла өлгө.