Аҙна уртаһы һәм көндөң тәүге яртыһы булыуға ҡарамаҫтан, Языков ауылындағы “Юлиә” төҙөлөш материалдары магазинында һатып алыусылар байтаҡ ине. Берәүҙәр ҡаҙаҡ кеүек нәмә менән ҡыҙыҡһынһа, икенселәр йортона ремонт яһарға уйлай икән, өсөнсөләре яңы тауарҙар менән таныша.

Магазин директоры Зилә Йосопова әйтеүенсә, һәр кем үҙенә кәрәк нәмәне таба ала, сөнки тауар күп. Булмаған осраҡта ла кәйефе төшөп сығып китмәйҙәр, заказ биреп, бер нисә көндән килеп алалар.
Зилә Рәмзил ҡыҙы һуңғы йылдарҙа төҙөлөш материалдарына ла, көнкүреш кәрәк-ярағына ла ихтыяж артыуын билдәләй. Район үҙәге Языков ауылында ошондай тауарҙар менән сауҙа иткән өс-дүрт магазин бар. Күренеүенсә, дәғүәселек көслө һымаҡ. Әммә уларҙы был мәсьәлә хәүефләндермәй, сөнки һатып алыусыларҙың ышанысын күптән яулағандар.
Шәхси магазин асыу менән бергә туғыҙ кешене эшле иткән Зилә Рәмзил ҡыҙы. Әлбиттә, эшҡыуарлыҡҡа тотондом тип әйтеүе генә еңел. Башлағансы әллә күпме мәшәҡәтте атҡарып сығырға, бина хәстәрләргә йәки төҙөргә кәрәк. Унан инде халыҡҡа кәрәкле тауарҙарҙы өйрәнеү, сауҙа серҙәренә төшөнөү өсөн дә байтаҡ ваҡыт сарыф ителә. Барлыҡ ошо эштә ире Булат Әнис улы — төп таянысы. Тәүәккәлләүе, батырсылыҡ итеүе нәҡ уның ярҙамына бәйле. Ә Булат Йосоповтың был тәңгәлдә тәжрибәһе ифрат ҙур, крәҫтиән (фермер) хужалығы етәксеһе ул. Бына шулай, бер-береһенә таяныс булып, йәштәр алға ҡарап эшләй һәм йәшәй.
Башлаусыһы булһа, ҡеүәтләүсеһе лә табыла, тиеүҙәре раҫ. Зилә Рәмзил ҡыҙының бухгалтер Нурия Әхмәтйәноваға рәхмәте ҙур. Тәүге мәлдәрҙә сауҙа серҙәренә ул төшөндөргән, бергәләп тауарҙарға заказ биргәндәр.
— Үҙем төҙөлөш материалдарының күбеһенең атамаһын да, ҡайһыларының ни өсөн ҡулланылыуын да йүнләп белмәй инем. Ярай әле, ул ярҙам итте, был өлкәне икәүләп өйрәндек, — ти магазин директоры.
Хәҙер инде Зилә Йосопова — һатып алыусыларҙың заказын ваҡытында үтәгән, сифатлы һәм заманса материалдарға өҫтөнлөк биргән, һәр нәмәнең тәғәйенләнешен яҡшы үҙләштергән эшҡыуар.
— Тауар тәҡдим итер алдынан һатып алыусының матди хәлен дә аңларға тырышам. Шуға ла процентһыҙ кредитҡа ла бирәбеҙ. Аҙ-аҙлап түләргә теләһә лә килешәбеҙ. Теге йәки был тауар ярамаһа, алмаштырыу йәки хаҡын кире ҡайтарыу мәсьәләһен дә тыныс ҡына хәл итәһең. Өйҙәренә илтеп биреү ҙә отошло. Заказдарҙы телефон аша ла ҡабул итәбеҙ, был һатып алыусыға ваҡыт сарыф итмәү өсөн һәйбәт. Ғөмүмән, табыш алыуҙы ғына маҡсат итеп ҡуймайым. Был ҡоро һүҙ түгел, әйткәндәрем тауар хаҡтарында ла асыҡ күренә — башҡаларҙыҡына ҡарағанда беҙҙә арзаныраҡ. Һатып алыусылар менән аңлашып-килешеп эш иткәнгә лә беҙгә ышаныс белдерәләр тип уйлайым, — ти Зилә Рәмзил ҡыҙы.