“Алға”, тағы ла “Алға”... Бүздәк районының был хужалығын малсылыҡ, үҫемлекселек ярыштарында, йыллыҡ эшмәкәрлеккә йомғаҡ яһағанда һәр саҡ маҡтап телгә алалар. Үҙҙәрендә генә түгел, республика кимәлендә лә.

Былтыр ауыл хужалығы продукцияһын етештереүҙә юғары уңыштарға өлгәшкәне өсөн кооператив Башҡортостан Республикаһы димпломына һәм аҡсалата дәртләндереүгә лайыҡ булды.
Әлбиттә, яҡшы күрһәткестәр күктән төшмәй, ҡаҙаныштар ҙа буш урында барлыҡҡа килмәй. Тырышлыҡ, эшеңде яратып башҡарыу, яуаплылыҡ тойоу, йөктө бергә тартыу һөҙөмтәһе был. Ә “Алға” кооперативында уңған эшсәндәр һәр тармаҡта етерлек. Мәҫәлән, баҫыусылыҡты алайыҡ. Румбик Ғәликәев – иң уңған, иң тәжрибәле механизаторҙарҙың береһе. Үҙенең ышаныслы “тимер аты”нда иртә яҙҙан ҡара көҙгә тиклем баҫыуҙан ҡайтып инмәй. Оҫта кукуруз үҫтереүсе, һалам эҫкертләүсе... Ул эштә арыу белмәй, башҡаларға ла тынғы бирмәй, ти уның хаҡында иптәштәре. Фиҙаҡәр хеҙмәте, ауыл хужалығы эшмәкәрлеген үҫтереүгә лайыҡлы өлөш индергәне өсөн Р. Ғәликәевте II һәм III дәрәжә Хеҙмәт Даны ордены менән бүләкләгәндәр. Шундай уҡ маҡтау һүҙҙәрен иң яҡшы тракторсыларҙың береһе Мансур Ғабдуллинға ҡарата ла әйтергә мөмкин. Ришат Сираев, Ринат Шафиғуллин шәкәр сөгөлдөрө үҫтереүҙә ҙур тәжрибәгә эйә. Ә Тәлғәт Ғәликәев менән Радик Вәлиев быйылғы яҙғы баҫыу эштәре һөҙөмтәләре буйынса район механизаторҙары араһында алдынғылыҡҡа сыҡты. Финат Ғәлиуллин, Мансур Сабиров, Фәзит Насибуллин, Рәзит Хәкимуллин, Радик Назаров, Сәбил Бәҙретдинов, Фәрит Низаев, Фирүз Хажиев – был егеттәр ҙә бер нисә тиҫтә йыл туған колхозы яландарында һынатмай.
Әле хужалыҡта ал-ял белмәй мал аҙығы әҙерләйҙәр. Унан ураҡҡа ла күп ҡалмай. Яҡшы күрһәткестәр өсөн ҙур тырышлыҡ талап ителгәнлеген һәр кем аңлай һәм, тәжрибәһенә, оҫталығына егәрлелеген ҡушып, дәртләнеп эшләй. Ә уңған коллективтың хеҙмәт бейеклектәренә әйҙәүсеһе – “Алға” кооперативының тынғыһыҙ, абруйлы рәйесе Фән Вәлиев етәкселегендәге белгестәр командаһы. Ул бурыстар билдәләй, йүнәлеш бирә, хужалыҡ эшсәндәренең йәшәйешен, имен тормошон ҡайғырта.