Йыл һайын һабантуй алдынан район хужалыҡтары баҫыу алдынғыларын, үҙ эшенең оҫталарын һабансылар бәйгеһенә ебәрә. Быйыл төрлө маркалағы тракторҙа
30 механизатор көс һынашты.

Конкурс Урманай һәм Яңы Маты ауыл биләмәләрендә үтте. Район мәҙәниәт һарайының һәүәҫкәр артистары сараны концерт номерҙары менән йәмләне.
Ярышты райондың ауыл хужалығы идаралығы начальнигы Рафаэль Ғарифуллин асты. Баш агроном Диләүир Нәбиев бәйгенең шарттары, ҡағиҙәләре менән таныштырҙы. Эште баһалағанда төп иғтибар ерҙең сифатлы һөрөлөүенә, бураҙнаның киңлеге, тигеҙлегенә, башҡа күрһәткестәргә бирелде. Шулай уҡ һабансыларға өс көн эсендә 1200 гектар майҙанды һөрөү бурысы ҡуйылды.
Артабан сарала ҡатнашыусыларҙы район хакимиәте башлығы Александр Андреев сәләмләне.
— Районыбыҙҙа ер эшкәртеү культураһының үҫеше лә, яңы техниканы һөҙөмтәле файҙаланыу ҙа, баҫыуҙарыбыҙҙың уңдырышлылығы ла механизаторҙарыбыҙға бәйле. Бөтәбеҙҙе лә берҙәй шатландырғаны — һабансыларҙың оҫталығы, — тине ул.
Идаралыҡтың баш инженеры Валентин Абрамов яңынан күһәтмәләрҙе иҫкә төшөрҙө һәм ярышҡа старт бирҙе. Машиналар билдәләнгән баҫыуға юл алды. К-700, ДТ-75 һәм башҡа ҡеүәтле техниканың ҙур булмаған майҙанда оҫта эш итеүе ситтән күҙәтеүселәрҙә һоҡланыу тыуҙырҙы.
Һабансыларҙың тәртип һаҡлап, бер-бер артлы тигеҙ барыуы матур күренеш ине. Ярыштың баш судьяһы Диләүир Нәбиев етәкселегендәге комиссия пар баҫыуы һайын йөрөп, һигеҙ күрһәткес буйынса тракторсыларҙың эшен баһаланы.
Конкурсты йомғаҡлау көнө килеп етте. Баҫыуҙа оҫталыҡ буйынса көс һынашҡан тракторсы-машинистарҙы ялан ситендәге сәхнә янына саҡырҙылар. Батырҙарҙы ҡотларға ауыл хужалығы министрының беренсе урынбаҫары Николай Коваленко килгәйне.
— Баҡалы районы үҙенең тырыш, сәмсел, бөтмөр халҡы менән дан тота. Нисә йылдар дауамында Һабансылар байрамын ҙур ойошҡанлыҡ менән уҙғараһығыҙ. Ер беҙҙе туйҙыра, табышты унан алабыҙ. Рәхмәт һеҙгә, ялан батырҙары, — тине ул.
Өс көн барған ярыш йомғаҡтары буйынса беренсе урынды “Искра-Транс” яуаплылығы сикләнгән йәмғиәте механизаторы Николай Горлов яуланы һәм ат менән бүләкләнде. Унан аҙ ғына ҡалышҡан “Агроурожай” хужалығы тракторсыһы Юрий Красновҡа тана бирелде. Өсөнсө урынды “Новый мир” ауыл хужалығы кооперативынан Юрий Босов алды, уға бүләккә быҙау тапшырылды.