Өфөлә яңы төҙөлгән йорттарҙа торлаҡтың уртаса хаҡы билдәле булды

Өфөнөң яңы төҙөлгән йорттарында квадрат метрҙың хаҡы 2025 йылдың мартында 159 мең һумға еткән, тип хәбәр иттеләр Яндекс компанияһының матбуғат хеҙмәтенән «Яндекс Күсемһеҙ милек» сервисы мәғлүмәттәренә һылтанма менән.

Рәсәйҙең миллионлы ҡалаларында беренсел торлаҡ баҙарында квадрат метрҙың уртаса хаҡы март айында февраль менән сағыштырғанда 0,6% артып, 181 мең һум тәшкил иткән. Шул уҡ ваҡытта 16 мегаполистың 11-ндә хаҡтарҙың артыуы күҙәтелә.

Башҡортостандың баш ҡалаһында яңы төҙөлгән йорттарҙа квадрат метрҙың уртаса хаҡы 159 мең һумға еткән. Бер ай эсендә ул 0,6% артҡан. Шул уҡ ваҡытта тәҡдимдәр һаны 0,4% күбәйгән. Өфөнөң беренсел баҙарында фатирҙың уртаса хаҡы — 7,4 миллион һум, ә уртаса майҙан 45,7 квадрат метр тәшкил иткән.

Шул уҡ ваҡытта Мәскәүҙә яңы йортта бер «квадрат» март айында 403 мең һумға, Санкт-Петербургта — 263 мең һумға, Екатеринбургта — 162 мең һумға, Ҡазанда — 236 мең һумға, Краснодарҙа — 145 мең һумға, Пермдә — 156 мең һумға, Түбәнге Новгородта — 185 мең һумға, Һамарҙа 128 мең һумға барып баҫҡан. 

https://www.bashinform.ru/news/economy/2025-03-27/nazvana-srednyaya-stoimost-zhilya-v-novostroykah-ufy-4175071