Башҡортостандың атҡаҙанған ауыл хужалығы хеҙмәткәре Ринат Хәйбрахманов — малсылыҡ тармағында күп көс, тырышлыҡ һалған, ҙур тәжрибә туплаған кеше. Ун туғыҙ йыл Борай һөтсөлөк фермаһына етәкселек иткән. Баш зоотехник эшен алып барған. Ете йыл инде “Урожай” ауыл хужалығы кооперативы рәйесе вазифаһын башҡара.
Йылдар дауамында ҡанына, ғәҙәтенә һеңеп ҡалған ахыры Ринат Лотфи улының: уның һәр таңы, көнө тиерлек элеккесә мал һимертеү комплексы, ферма эше менән танышыуҙан башлана. Бына бөгөн дә Р. Хәйбрахмановты эш бүлмәһендә осрата алманыҡ.
— Әле генә фермаға китте, — тине хисапсы ҡыҙҙар. Беҙ ҙә шунда юлландыҡ. Рәйес малсылар йортонда йылмайып ҡаршыланы.
Иртәнге һауым яңыраҡ ҡына тамамланған. Эштәрен теүәлләһә лә, малсылар өйҙәренә таралышырға ашыҡмай ине.
— Һәр дүшәмбелә ошолай йыйылып, уҙған аҙнаға йомғаҡ яһайбыҙ, — тине ферма мөдире Елена Шәйҙуллина.
Ә күрһәткестәре насар түгел. “Урожай” кооперативы көн һайын 52 центнер һөт һата. Уҙған йылдың ошо осоро менән сағыштырғанда, алты центнерға күберәк был. Продукция нигеҙҙә беренсе сорт менән оҙатыла.
Хужалыҡ малсылары бер ваҡытта ла арттағылар рәтендә йөрөмәне.
— Район буйынса һәр саҡ беренсе урынды алып килдек, — ти элекке ферма мөдире, бөгөнгө рәйес Хәйбрахманов.
Кооператив былтырғы йылды 7 миллион һум саф табыш менән тамамланы. Финанс тотороҡлолоғо күп мәсьәләләрҙе тиҙ арала, ауырлыҡһыҙ хәл итергә мөмкинлек бирә. Һалымдар, пенсия фондына һәм башҡа түләүҙәр айҙыҡы айға күсерелеп тора. Һуңғы өс йылда ғына ла өс Т-150, өс МТЗ-82, “Полесье” мал аҙығы, дүрт “Нива” ашлыҡ комбайны, ике аҙыҡ ҡатнашмаһы яһаусы агрегат, Т-150 һәм К-700 тракторҙарына дискатор, өс сәскес һәм тупраҡ эшкәртеү машиналары һатып алынды.
Хеҙмәт хаҡы йылға бер нисә тапҡыр ҡаралып арттырыла. Шуның һөҙөмтәһендә хужалыҡ эшсәндәренең килеме арта. Мәҫәлән, һауынсылар бөгөн айына 10–12 мең һум эш хаҡы ала. Бәлки, шуғалыр ҙа “Урожай”ҙа эшсе ҡулдарға ҡытлыҡ кисермәйҙәр. Улай ғынамы әле, малсылыҡта эшләргә теләк белдереүселәр арта бара.
— Кемдер хаҡлы ялға китһә йәки башҡа урынға күсһә, уларҙың эшен һорап ике-өс кеше килә, — ти ферма мөдире.
Хужалыҡта киләсәккә өмөт менән йәшәйҙәр. Кооперативтың бөгөнгөһө — шул өмөттөң нигеҙе.