Хужалыҡ етәкселеге егәрлеләрҙе дәртләндереүҙең төрлө алымдарын ҡуллана.

Ауылда шөғөлдөң юҡлығына зарланыу һүҙҙәрен, колхоз-совхоздарҙың тарҡалыуы, кешеләрҙең ситкә китеүе тураһында хәбәрҙәрҙе ялҡауҙан ғына ишетергә мөмкин. Арҡырыны буй алып һалыу урынына кире күренештәрҙе ҡуйыртыусылар бар әле. Ә бына Дүртөйлө районын егәрлеләр төбәге тип әйтеү ысынбарлыҡҡа тап килә. “Ғөмүмән, беҙҙә ирҙәр аҡса табыр өсөн ситкә китмәй, үҙ ерендә ни менәндер мәшғүл”, – тип һөйләй райондың ауыл хужалығы идаралығы начальнигы Илгиз Зиннәтуллин.

Ғәҙәттә, октябрь аҙаҡ­тары – ноябрь баштары баҫыуҙар, ат сабышынан һуң тынып ҡал­ған ипподромды хә­терләтә. Был ваҡытта ерҙе туңға һөрөү тамамланыу алдында, малдар фермаға ҡай­та, бесән-һалам ташыла. Әйткәндәй, айырым алғанда, быйыл ра­йондың Ленин исе­мен­дәге яуаплылығы сикләнгән йәмғиәте иген­селәренең гектарынан 30 центнерға яҡын уңыш йыйыуы – яҡшы күрһәткес.

Хужалыҡ иген культуралары май­ҙанын йылдан-йыл киңәйтә. Идаралыҡ Һыуыҡҡул ауылында урынлашҡан. Төп йөктө бөтәһе 130 эшсән тарта.
Хужалыҡ етәкселеге эшһөйәрҙәрҙе дәртләндереүҙең төрлө алымдарын ҡуллана. Беренсенән, бында йәштәр бихисап. Уларҙың һәр береһе үҙ тө­йәгендә ҡалырға ынтылып тора, туған хужалығының киләсәге өсөн көсөн дә йәлләмәй, ваҡыты менән дә иҫәп­ләшмәй.

– Кемгә генә туҡталмайыҡ, маҡтау­ҙан бүтән бер һүҙ ҙә еткерә алмайым, – тип һөйләй йәмғиәт рәйесе Альберт Дәүләтбаев. – Шәхсән минең өсөн уларҙың барыһы ла бер тигеҙ, айырып ҡарау тигәнде ҡабул итмәйем. Әгәр ҙә тырышалар икән, ниңә уларҙы һәр йәһәттән дә дәртләндермәҫкә?! Ҡыҫҡа­һы, эшсәндәр үҙенең донъяһын нығыт­һын өсөн ҡулдан килгәнсә ярҙам итәбеҙ, ә һәр кешенең хужалығы ныҡлы булғанда ғына дәүләт һәм йәмәғәт эштәренә күңеле ашҡына.

Мәҫәлән, йәш белгес Илшат Сәли­хов бында күптән тир түгә. Егет Эльвира исемле һылыуҡайға өйләнгән. “Эштән йәм табыу – беҙҙең өсөн ҙур бәхет”, – ти улар. Сәлиховтар йәмғиәт тарафынан һәр йәһәттән дә яҡлау тапҡан.

Кашаповтар тураһында ла шулай әйтергә мөмкин. Заманса өй һалып сыҡҡандар, бәләкәй генә булһа ла үҙҙәренең хужалығы бар.
Инженер Линар Кашапов хужалыҡҡа саҡырылғас, егеткә 100 мең һум күлә­мендә “подъемный” бирелгән, бынан тыш ер майҙаны алған, әле респуб­ликабыҙҙың Ауыл хужалығы министр­лығы ете мең һум өҫтәмә хеҙмәт хаҡы түләй. “Кәләшем Лилиә лә был йәм­ғиәттә бухгалтер йөгөн тарта, икебеҙ ҙә уртаҡ мәнфәғәттәр менән янабыҙ. Дәүләтбаев булдырған дәүләтебеҙ ныҡ һәм төҙөк”, – ти йорт хужаһы.

Бында эштәрҙең күбеһе автомат­лаштырылған. Антенна ярҙамында һауын һыйырының хәл-торошон компьютерҙан күҙәтеүе, малдарҙың аяғына “шагометр” беркетелеүе, бесән-силосты роботтың этеп йөрөүе һәм башҡалар күпте һөйләй. Ҡыҫҡаһы, бында һәнәк-көрәк тотоп йөрөүсене күрмәҫһең, шуға күрә лә хужалыҡҡа эшкә килергә атлығып торалар.