Ил алдындағы бурысын намыҫ менән үтәп ҡайтҡан Дмитрийҙы (ә егет Төньяҡ Кавказда хеҙмәт иткән) күптәр кире көньяҡҡа китер, киләсәктә яҙмышын армия менән бәйләр тип уйлаған. Фараз итеү бер, әммә йөрәк ни бойора бит әле. Мыҡты кәүҙәле, төплө фекерле егеткә, һүҙ ҙә юҡ, был хаҡта тәҡдим яһай офицерҙар. “Үҙеңде тик яҡшы яҡтан күрһәттең, армия һинең кеүектәргә таяна, һәр хәлдә, 23 йылдан пенсияға сығасаҡһың”, – тип төрлөсә өгөтләйҙәр. Егет һүҙе бер була, ул атаһының тыуған нигеҙендә төпләнеүҙе хуп күрә. Әле Дмитрий Козлов Спартак ауылында ғүмер итә, “Спартак-агро” хужалығының алмаштырғыһыҙ эшсеһе, алдынғы механизаторы. Уның фекерҙәре гәзит уҡыусыларға ла ҡыҙыҡлы булыр.

– Вәғәҙә тигән төшөнсәгә бик һаҡ ҡарайым, шуға ла фекеремде еткерер алдынан ете ҡат уйлайым, – тип башланы һүҙен Дмитрий Николаевич. – Армияла ҡалырға ла булыр ине, әммә тыуған яҡ нығыраҡ тартты. Шуға ла өҙөп кенә бер нимә лә әйтмәнем командирға.

Йылдар үтә, йәш тә бара, тигәндәй. Әҙәм балаһы төрлөсә уйлана бит инде. Ғаиләнең ҡәлғә ролен үтәүенә ваҡыт үткән һайын нығыраҡ төшөнә барам. Кәләшем Марина менән бер-беребеҙҙе ярты ҡараштан аңлайбыҙҙыр, тим. Һөйөклөм – йортобоҙҙоң усағын һүндермәүсе маяҡ. Тәмле аш менән ҡаршы алып, алсаҡ йөҙө менән оҙатып ҡала икән, миңә ошонан да артығы кәрәкмәй. Икебеҙ ҙә балаларыбыҙ тип йән атабыҙ. Маҡсат – ҙур йөрәкле кеше булып ҡалһындар. Улым Александр һалдат бурысын үтәргә әҙерләнә. Үҙенең һүҙен һүҙ итеп үҫеүенә ҡыуанып бөтә алмайым. “Ир әйтте, ир эшләне” тигән позицияны тота. Кем белә, оҡшаһа, бәлки, армияла ла ҡалыр әле. Сәскәләй ҡыҙыбыҙ Настя ауыл мәктәбендә 4-се класта уҡый. “Класыбыҙ шул тиклем матурайған, хатта танымай ҙа торҙоҡ”, – тип күркәмлеккә иҫе китеп һөйөнөп ҡайтҡан 1 сентябрь байрамынан. Балаларҙың бәләкәйҙән эргә-тирәгә иғтибарлы булыуына ниңә шатланмаҫҡа?!

Бер осор хужалыҡтың кәмәһе ҡомға терәлер мәлдә күршеләрҙең ярҙам ҡулы һуҙыуы иңдәргә ҡанат ҡуйҙы. Тыуған ауылымдағы хужалыҡ та тарҡалһа... Быны күҙ алдына килтереүе ауыр. Ырымбур өлкәһе Абдулла районының Сағанлы ауылы менән хәҙер беҙ туғандар. Былай шаяртыуым тиккә түгел, ундағы хәлле хужалыҡ менән ҡушылғас, хәлдәр яҡшырҙы. Эш хаҡы ваҡытында түләнә, хатта дәртләндереү ҙә ҡаралған, заманса техникала йөрөйбөҙ. Хәйер, элек тә бәйләнештәр ныҡлы булды. Спартак ниндәй мәғәнәгә эйә? Саған ҡаты ағас, шулай бит.

Берләшеүҙең бындай алымы – отошло. Бынан ары беҙгә бер ниндәй ҙә ҡатмарлыҡтар осрамаҫ.