Ошо көндәрҙә Күгәрсен районы үҙәге Мораҡта Башҡортостандың көньяҡ райондарының социаль-иҡтисади үҫеше йүнәлештәрен нигеҙләүгә арналған сара үткәрелде. Төбәктең йәшәйеш нигеҙе тураһында булыуын иҫәпкә алып, “стратегик сессия” тип аталған был йыйында Башҡортостандың Стратегик тикшеренеүҙәр институты ғалимдары, Күгәрсен, Баймаҡ, Ейәнсура һәм Федоровка райондары белгестәре ҡатнашты.

– Бөгөн беҙ үҙебеҙҙең төп эшмәкәрлекте халыҡтың тормош сифатын яҡшыртыуҙа, йәшәү өсөн уңайлы һәм хәүефһеҙ шарттар тыуҙырыуҙа күрәбеҙ, – тине Күгәрсен район хакимиәте башлығы Ғайса Янбаев үҙенең тәбрикләү һүҙендә. – Төбәгебеҙҙә – күп тармаҡлы иҡтисад, уның барлыҡ формалары ла тиң хоҡуҡлы. Ҙур ауыл хужалығы предприятиелары ла һаҡлап ҡалынды, шул уҡ ваҡытта крәҫтиән (фермер) хужалыҡтары ла үҙҙәрен йылдан-йыл ышаныслыраҡ тоя. Бәләкәй эшҡыуарлыҡ өсөн шарттар яҡшыра бара, эшһеҙлек кимәле кәмей.
Ғайса Ғилметдин улы сарала ҡатнашыусыларҙы райондың үҙенсәлектәре һәм бөгөнгө социаль-иҡтисади хәле менән таныштырҙы. Һуңғы йылдарҙа төбәктең үҫеше ыңғай баһалана – 16 урта һәм бәләкәй ауыл хужалығы предприятиеһы, 78 крәҫтиән (фермер) хужалығы етештереүҙе арттыра.
Эксперттар сессияһында төп доклад менән Стратегик тикшеренеүҙәр институты директоры урынбаҫары, иҡтисад фәндәре кандидаты Светлана Насирова сығыш яһаны. Ғалимә раҫлауынса, әле төп проблема райондар үҫешенең тигеҙһеҙлегенә ҡайтып ҡала. Уның киләсәк маҡсаттарҙы интеграль күрһәткестәр менән билдәләү, күрше өлкәләрҙең республикабыҙ үҫешенә йоғонтоһо, төбәктең эсендә үҫеште тигеҙләү мөмкинлектәре тураһындағы һәм башҡа мәғлүмәттәре һәр кемдә ҡыҙыҡһыныу тыуҙырҙы.
Стратегик сессияның төп өлөшө, йәғни секцияларға бүленеп эшләү, тағы ла йәнлерәк барҙы. Уларҙа белгестәр һәм йүнселдәргә үҙҙәрен борсоған проблемалар буйынса фекер алышыу, институт ғалимдарының ошо мәсьәләләргә аңлатмаһын тыңлау мөмкинлеге тыуҙырылды. “Ете ҡыҙ” ательеһы етәксеһе Әминә Әҙелғужина әйтеүенсә, сара эшҡыуарҙар өсөн айырыуса файҙалы булды, күп төшөнсәләрҙең айышын аңларға ярҙам итте һәм эштә уларҙы ышаныслыраҡ ҡуллана башлау теләген арттырҙы. Институттың өлкән ғилми хеҙмәткәре Николай Лавренюктың, техник фәндәр кандидаты Денис Поповтың социаль һәм биләмәләр үҫеше трендтарын танып белеү һәм үҙенсәлектәрен артабанғы планлаштырыуҙа иҫәпкә алыу тураһындағы сығыштары тыңлаусылар менән аралашыу, һорау-яуап рәүешендә барҙы.
Өфө дәүләт нефть техник университеты ғалимы Ринат Шәйәхмәтов, Башҡортостан дәүләт аграр университетынан ауыл хужалығы фәндәре докторы Ринат Ғиззәтуллин һәм башҡаларҙың сығыштары ла төбәктәрҙең үҫеш мөмкинлектәренә бағышланғайны. Стратегик сессия йомғаҡтары буйынса проект башланғыстары булдырылды, һәм был проекттарҙы тормошҡа ашырасаҡ командалар төҙөлдө.

Күгәрсен районы.