Ауырғазы районы үҙәгендә һуңғы осорҙа 600 кеше йорт һала башлаған

Талбазыға, ғәҙәттәгесә, федераль трассанан уңға боролоп инеп китәйек тиһәк, булманы: юл сатында әллә күпме техника эшләй, район үҙәгендәге йүнәлеште ҡаҙыйҙар, түшәйҙәр, тигеҙләйҙәр... Ахырҙа, ауылды үтеп, көньяғынан урап инергә тура килде. Тик төҙөлөш эштәре бында ла туҡтамай ине.

– Бына Талбазының үҙәгендә, район хакимиәтенә ҡаршы ғына тип әйтерлек, Физкультура-һауыҡтырыу комплексы төҙөлә башлаясаҡ, – тип район хакимиәте башлығының төҙөлөш һәм торлаҡ-коммуналь хужалығы буйынса урынбаҫары Илдар Әмирханов яңы объекттың урынын күрһәтә. – Быға саҡлы бассейны ла булған комплекс беҙҙең районда юҡ ине. Ошо уҡ проект буйынса күршеләге Әлшәй районында ла һалғайнылар. Ләкин уларҙа был комплекс 150 миллион һумға төшһә, ә беҙҙә ул сығымдарҙы 12 миллион һумға күберәк талап итәсәк, сөнки ауыл уртаһын­дағы коммуникация селтәрен күсерергә, таҙартыу ҡоролмалары ҡорорға тура киләсәк. Проект экспертиза үтте. Әлеге ми­нуттарҙа беҙҙең район хакимиәте башлығы Зөфәр Йәүҙәт улы Иҙрисов Хөкү­мәт кәңәшмәһендә ошо 12 миллион һумды нигеҙләү менән мәшғүл. Шундай проблемалар һәм кисекмәҫтән хәл итеүҙе талап иткән мәсьәләләр күп инде ул төҙөү-ҡороу эшендә, әммә әлеге объекттың һалына­са­ғына һәм тап ваҡытында сафҡа инде­реләсәгенә ышаныс менән ҡарарға кәрәк, сөнки Физкультура-һауыҡтырыу комплексы Башҡортостан Башлығы Рөстәм Хәмитов­тың башланғысы менән республиканың йөҙ йыллығына әҙер буласаҡ 100 объект исемлегенә индерелде.
Һыу үткәргес тә яңыртыла Талбазыла. Күптәр белмәйҙер ҙә әле: был тирәлә ҙур күләмдәге эсәр һыу сығанағы юҡ, шуға күрә район үҙәгенә һыу үткәргесте Ғафури районының Аҡкүл станцияһынан төньяҡ­тараҡ ятҡан сығанаҡтан һуҙырға мәж­бүрҙәр. Ауырғазы районының яртыһы аша тиерлек үтәсәк был торбаның тәүге этабы 24 миллион һумға төшәсәк, артабанғы эш өсөн 36 миллион һум бүлеү мәсьәләһе тикшерелә, ләкин яңыртмай ҙа булмай, сөнки әле эшләгәне 1976 йылда уҡ һалынған.
Шулай ҙа Талбазыла тәү сиратта күҙгә бәрелгән һәм иң ҙур төҙөлөш майҙаны – торлаҡ йорттар. Был район үҙәгенән аша үтеп йөрөгәндә күрмәй булдыра алмайһың: һуңғы ун йыл эсендә ауыл ике тапҡырға тиерлек ҙурайған. “Ҡыҙыл линия”ла, йәғни Өфө – Ырымбур трассаһы менән Красноусол – Дәүләкән юлы киҫешкән ерҙә ултырған, баш ҡаланан 80 километрҙа ғына ятҡан Талбазыны күптәр даими йәшәү урыны итеп һайлай. Әйтеүҙәренсә, бында күсеп килгән ғаиләләр һаны күсеп киткәндәрҙән артығыраҡ.
...Талбазы ауыл биләмәһе башлығы Айҙар Нафиҡов менән машинала ауылды урап йөрөйбөҙ. Ҡайҙа ҡарама, яңы урамдар, ҡайһыларына асфальт та түшәлгән, бәғзеләренә әле өлгөрмәгәндәр ҙә, төрлө төҫтәге кирбес өйҙәрҙән һәм профнастил менән көпләнгән ҡоймаларҙан күҙҙәр ҡамашырлыҡ. Һуңғы өс йылда ғына ла шәхси йорт төҙөү өсөн ташламалы хаҡтарҙан файҙаланыу хоҡуғы булған 600-ҙән ашыу ғаиләгә ер биләмәһе бүленгән икән. Ауыл өсөн был – бик ҙур күрһәткес, хатта ул ҙурая барған район үҙәге булһа ла. “Ә был ике биҫтә араһында ни өсөн буш майҙансыҡ ҡалдырылған?” – тип күрһәтәм. “Бында социаль-көнкүреш комплексы һалынасаҡ”, – ти Айҙар Ришат улы. Ысынлап та, төҙөлөп ятҡан йорттар ҙа бихисап бит, тимәк, күсеп килгән йәш ғаиләләр ҙә күбәйәсәк. Социаль объекттарға ла мохтажлыҡ арта. Күптән түгел төҙөкләндерелгән ял паркы ла, нигеҙҙә, балалы ғаиләләргә иҫәпләнгән.
Иң ҡыуаныслыһы шул: бындай объекттар Талбазыла күбәйә бара, һәм үҫешкә бер ниндәй иҡтисади ҡыйынлыҡтар ҙа кәртә була алмай. Ике йыл элек кенә 5-се балалар баҡсаһы файҙаланыуға тапшырылған. Халҡы 12 меңдән ашҡан был ҙур ауыл киләсәктә ҡалаға ла әйләнеп китмәҫ тимә.