Заман талаптарына тура килгән, йылдар дауамында төрлө үҙгәрештәргә яраҡлашып баҙар иҡтисады шарттарында һаҡланып ҡалған район ҡулланыусылар йәмғиәте бөгөн ғәҙәти күренеш түгел. Шулай ҙа яңы һулыш һәм йүнәлеш менән йылдам үҫешкән, уңышлы эшләп килгән ойошмалар бар әле.

Федоровка районында, мәҫәлән, ҡулланыусылар кооперацияһы 1932 йылда ойошторола. Ул саҡта Райпотребсоюздың рәйесе итеп Константин Яценко һайлана. Районда Федоровка, Тәнәй, Бүләкәй, Балыҡлы, Дедов, Новоселка, Златоустовка ауыл ҡулланыу йәмғиәттәре барлыҡҡа килә. Сеймал ҡабул итеү бүлеге һәм әҙерләү контораһы ла булдырыла.
1945 йылдан алып төрлө йылдарҙа район ҡулланыусылар союзының эшмәкәрлеге Т. Дементьев, С. Какурин, Г. Зөбәйеров, Т. Лысенко, Р. Ҡадиров, К.Максимов, А. Волков кеүек тырыш етәкселәрҙең исемдәре менән бәйле. Ул саҡтарҙа ҡулланыу йәмғиәтенә барлыҡ тауарҙы районға яҡын урынлашҡан Стәрлетамаҡ ҡалаһынан ылауҙар менән 1953 йылдан тракторҙарҙа ташыйҙар. 1953 йылдан һуң иһә районға ике машина бүленеп, тауарҙы Мәләүез ҡалаһы ойошмаһынан да еткерәләр.
1963 йылда ойошманың рәйесе итеп Х. Мортазин тәғәйенләнә, ул сауҙа эшен 1985 йылға тиклем алып бара. Ошо йылдарҙа ойошманың матди-техник базаһы яҡшыра – 27 магазин, 105 урынға иҫәпләнгән ашхана, универмаг, етештереү ҡеүәте тәүлегенә 15, 4 тонна тәшкил иткән икмәк комбинаты төҙөлә.
Һуңғараҡ етәксе вазифаһына Т. Баҡыев килә. Сауҙа өлкәһендә уның дөйөм эш стажы – 30 йыл. Уның эшләү дәүерендә районда 13 магазин, кондитер әйберҙәре һәм алкоголһеҙ эсемлектәр етештереү комбинаты, колбаса эшләү цехы, келәттәр төҙөлә, автогараж бинаһы ҙурайтыла.
Т. Согумова, И. Ҡормаев, И. Нурлы­ғаянов етәкселек иткән йылдарҙа ла ҡулланыусылар йәмғиәте тотороҡло үҫешә. Универсаль баҙар асыла, “Федоровка”, “Гермес” тип аталған яңы ҡулланыусылар ойошмалары барлыҡҡа килә.
Бөгөн кооперацияға Илһам Баҡыев етәкселек итә һәм ойошма “Гермес” ҡулланыусылар йәмғиәте һәм “Уңыш” кооперативы исеме менән билдәле.
– Район кооперацияһы – күп тармаҡлы структура. Бында бөгөн икмәк, кондитер аҙыҡтары әҙерләнә, кулинар һәм ит ярымфабрикаттары етештерелә.
Ҡулланыусылар кооперацияһының 86 йыллыҡ данлы юлы бар, – ти Илһам Шамил улы.
Әйткәндәй, бөгөн бында ауыл хужалығы продукцияһын әҙерләү, икмәк һәм кондитер аҙыҡтарын, шулай уҡ ярымфабрикаттар етештерәләр.
Шәхси продукцияһын “Гермес” ҡулланыу йәмғиәте 20 магазинында, Федоровка, Көйөргәҙе райондары һәм Салауат ҡалаһы эшҡыуарҙарының 30 сауҙа нөктәһендә һатыуға сығара. Шулай уҡ 128 урынға иҫәпләнгән ашхана эшләй. Сифатлы, экологик яҡтан таҙа продукция оло һорау менән ҡулланыла.
Предприятиелар130-ҙан ашыу кешене эш менән тәьмин итә. Былтырҙан алып райондың 20 мәктәбендә туҡланыу ойошторғандар. Ашханаларҙа эшләгән бөтә хеҙмәткәрҙәр ҙә тулы социаль пакет менән тәьмин ителгән.
Ҡаҙаныштары өсөн “Гермес” төрлө кимәлдәге грамоталар һәм дипломдар менән бүләкләнгән.
– Киләсәктә яңы ҡоролмалар һатып алыу, сауҙа объекттары селтәрҙәрен киңәйтеү һәм төрлө тармаҡтағы етеш­тереү өлкәһенә яңы технологияларҙы индереү маҡсаты тора. Берҙәм тырышлыҡ менән быларҙың барыһына өлгәшербеҙ тип ышанам, – ти Илһам Шамил улы.